KATOLIK Daiosis long Wewak, Is Sepik Provins i holim wanpela bikpela Misa long Tunde dispela wik long tok gutbai long Gren Sif Sir Michael Thomas Somare long laspela taim.

Ol I holim wanpela naispela misa tru we moa long 20 tausen pipel i kamap na stap insait long en na planti moa i bihainim long televisen na redio.

Kardinel Sir John Ribat i go pas long dispela Misa wantaim ol lain bisop, pris, diken na katekis bilong em.

Bisop Jozef Roszynski SVD wantaim tim bilong em i redim wanpela naispela program tru we i fit long wanpela lidaman, wanpela visita husat i kam long Goroka long stap wantaim ol pipel bilong Is Sepik long taim ol i planim bodi bilong Gren Sif Sir Michael Somare i tok.

Narapela i tok, “Em i hat tru long sindaun lotu na aiwara i no kam daun. Misa i kamap gut tru wantaim ol singsing na ol prea. Tenkyu tru bisop Jozef.”

Taim ol i kisim tok olsem Gren Sif Sir Michael i dai, ol i bin krai na sori tasol hariap ol i sindaun na prea . Na tu ol i bin laitim kendel na holim prosesio i go long Boys Taun long wanpela memorial bilong Santu Maikel we Gren Sif Sir Michael yet i bin stap wantaim ol taim ol i blesim.

Dispela misa i pulap long kala, kalsa, na pasin rispek.

Dispela pasin bilong prea ol i holim yet inap tupela wik olgeta.

Las nait ol i laitim kendel gen na wokabaut na singsing lotu stat long Krais i King Peris long Wirui i go long Sir Michael Somare Stedium we ol arapela pipel i stap pinis.

Gren Sif Sir Michael Thomas Somare husat i dai na lusim yumi pinis i bin stap strong long Katolik bilip bilong em olsem wanpela Kristen.

Krais i King peris em i peris we em i save go lotu long en olgeta taim em i stap long Wewak.