AROT Kongrigesen bin luksave long wanpela yangpela Seminari man i kam long Martin Luther Semineri Pasto Trening skul long las wik.

Olgeta Ekseketive bilong Arot kongrigesen bilong ELC Siasi Distrik olsem; siaman bilong ol Eric Baital, Tresera Jacob Ulai na Paris Tresera Mathew Joel wantaim olgeta kristen manmeri insait long sios i amamas long welkamim yangpela Willie Rutang i go insait long Martin Luther Semineri Skul na kisim skul bilong kamap wokman bilong God.

Siaman bilong Arot Kongrigesen Mista Baital i tok bikpela tenkyu long Bikpela long harim krai bilong ol bilip manmeri long Arot na givim dispela yangpela Rutang long Martin Luther semina. 

Ol Ekseketiv i bungim mani long baim skul fi bilong seminari em mak K3,970.00 long soim gutpela pasin long sumatin.

“Mipela i no wari long baim skul fi tasol bikpela samting em God harim krai bilong mipela ol Arot sios na salim dispela yangpela pasto long kam wokim bilong gem na senisim pes bilong ol yangpela long kamap wankain olsem em,” Baital i tok.

Em i tok Martin Luther Seminari na Logaweng na Hailens Luteren Seminari i mas luksave gut long kisim ol nupela lain go insait long skul bikos ol i ken wok klostu wantaim ol Sande skul pikinini na Kristen komyuniti na paris o distrik bung pastaim long kongrigesen paris na kisim em long Seminari.

Em i tok planti bilong ol kam na greduet na lusim wok bilong bikpela na tingting long painim narapela wok olsem na bikpela salens long olgeta Seminari Kaunsel na wokman long skelim gut pastaim long mekim disisen.

“Mipela laikim ol yangpela husat i gat bikpela tingting long sevim God na mekim wok gut long sios na i mas gutpela bel bilong kristen na kam kisim skul,” em i tok.

Em i tok tenkyu long kristen bilong Arot long sapotim yangpela Willie Rutang na God bai blesim yupela.

Em i tok tok wankain pasin i mas kamap long ol arapela distrik tu olsem, seket, paris, kongrigesen bilong ELC PNG long sapotim ol yangpela yut bilong yumi bai mas kamap olsem yangpela Willie.

Bikpela tenkyu lonh famili bilong Reveren Immanel Yalamu long sapotim ol na lukautim ol long taim ol i kam long Martin Luther Seminari skul.

Paulus Tali i raitim