BISOP Douglas Young bilong Maunt Hagen Katolik Daiosis i sindaun isi long baksait na harim ol toktok i kamap long bikpela Stet Misa bilong Indai long Gren Sif Sir Michael Somare long Pot Mosbi las wik Fraide.

Em i wanpela bilong ol lain bisop husat i bin kam long mekim dispela bikpela misa.

Long sia bilong em Bisop Douglas i mekim wanpela sotpela tok long em yet tasol em i tok em bilong Gren Sif Sir Michael Somare na ol pipel bilong Papua Niugini.

Bisop Douglas i tok, “Mi serim wantaim yupela dispela toktok mi no bin givim long dispela stet Misa.

“Em i no asua mi stap wantaim yupela nau olsem las man bilong Australia. Mi stap arere long dispela gutpela laip i mi serim wantaim yupela.

“Makim ol gutpela pipel bilong Australia wantaim gutpela bel husat i tingting wankain olsem mi, mi tok sori. Sori long ol pasin nogut mipela i mekim long daunim yupela na i no rispektim yupela. Mi tok sori tu long ol liklik pasin bilong mipela long daunim ol blak pipel we yu Gren Sif Sir Michael na ol arapela pipel bilong Papua Niugini i stap insait long en long taim bilong ol koloniel edministresen.

Pasin bilong wait pipel i rabisim na mekim nabaut long blak pipel em i liklik samting tasol long wankain taim em i no liklik samting.

Tasol insait long dispela olgeta hevi God i save bringim olgeta samting i kam wantaim long ol pipel i laikim em tumas. Na sapos dispela i bin kirapim bel bilong yu long wok hat long kisim independens bilong Papua Niugini na yumi olgeta em i gutpela tru.

Mi amamas tru tu olsem yu inap luksave long wanem samting yu ken tromoi i go aut na wanem samting yu ken holimpas. Taim yu rausim koloniel pasin yu no rausim Kristen pasin bilong yu, na moa yet Katolik bilip bilong yu.

Tru tumas em i luk olsem bilip bilong yu i givim strong long yu long rausim koloniel pasin.

Yu winim mak pinis gutpela wokman bilong God. Go malolo nau long amamas bilong God bilong yu.

Rosa Koian i raitim