Tenkyu long Papa. Em i bin mekim yupela i bihainim ol gutpela ol pasin, inap long yupela i ken kisim ol dispela lain i stap long lait bilong en. Yumi bin stap aninit long strong bilong tudak, na em i bin kisim bek yumi na putim yumi insait long lain bilong Pikikini bilong en, em dispela pikinini em I save laikim tru. Kolosi 1 : 12 – 13

Wanpela taim ol i mekim bikpela Sande lotu long wanpela taun bilong singautim ol manmeri long kam tanim bel. Planti manmeri i  kam harim tok. Tupela man tu i  kam na wanpela i holim wanpela blakpela beg i stap. Taim lotu i pinis, tupela i go pinis kwiktaim tru.

Sampela de bihain wanpela bilong tupela man i kam lukim pasto. Em i tok, “Mi laik givim samting long yu.”

‘Ating yu laik givim wanpela gutpela samting, a?” Pasto i  askim. “Nogat,” man i  bekim. Em i opim beg bilong en na i rausim ol kainkain ol samting em i save yusim bilong mekim raskol pasin long brukim haus. “Mi bin tanim bel pinis, na nau mi kisim ol dispela samting i kam na mi laik givim yu. Nogut traim i kamap long mi long yusim ol gen na mekim pasin nogut,” dispela man i tok.

“Olsem wanem na yu bin tanim bel,” Pasto i askim.

Nau man i tok, “Yu tingim yet? Las Sande long lotu yu bin autim tok long wanpela man i bin go hait antap long diwai na i  laik lukim Jisas. Tasol dispela man i no inap hait. Jisas i lukim em pinis na i tokim em long kam daun. Nau wankain samting em i kamap long mi.”

“Gutpela tru,” Pasto i tok.

Man i bekim na i tok, “Tasol bilong wamen yu kam harim lotu, na yu no go raun na brukim haus long Sande nait. Long Sande nait mun i  lait tumas na mi no inap go raun na mekim wok bilong mi.”

“Mi na pren bilong mi i raun nating na mitupela lukim planti man insait long dispela haus we yu bin mekim lotu. Olsem na mitupela i laik lukim wanem samting i kamap long dispela ples. Mi harim lotu, na God i  toktok strong long bel bilong mi. Nau mi no moa long mekim dispela wok nogut bilong mi. Mi tanim bel pinis na nau mi kam givim dispela ol samting long yu.”

Yes, God i gat planti kain rot bilong singautim ol man i kam tanim bel. Mipela tu i  laik bilip strong na prea moa bai planti i ken harim singaut bilong Jisas na lusim pasin tudak na kam long lait.