SIOS i mas wok olsem wanpela bodi long sevim ol pipel, wanpela sinia pasto i tok.

Pasto Aria Hegame bilong PNG Frontier Misin long Barakau viles, Sentral Provins i t ok.

Em i tok taim ol sios i wok bung wantaim, ol i ken strongim gut tok bilong Bikpela long laip bilong ol.

Em i mekim dispela tok long wanpela bung long Barakau i no longtaim i go pinis.

“Taim wanpela man i askim yu olsem yu save lotu o nogat, em i no askim long yu Kristen o nogat, em i askim long wanem sios bilong yu,” Pasto Hegame it ok.

“Sios nau i luk olsem wanpela haus nating tasol na ol pasto i wok long traim kamap wanpela kain ogenaisesen bilong ol yet.

“Ol toktok komyuniti i mekim wantaim sios i mas kamap long tok bilong Bikpela na i no long ol samting bilong graun.

Pasto Hegame husat em i saplin bilong Sentral Provinsal Gavman tu i tok namba bilong ol wok manmeri bilong God i mas bikpela tu olsem tok bilong Bikpela i ken go aut moa yet.

Em i tok tras long Bikpela wanpela i ken daunim ol hevi na traim i bungim bilip bilong ol manmeri.

Em i askim ol sios long ol i no ken resis na tok wanpela i tok stret na arapela i nogat taim ol autim tok bilong God.

Em i tok taim God Papa i salim pikinini bilong em Jisas Krais i kam daun, em i no tok long ol Tok bilong em i mas bruk bruk.

“Nogat. Tok bilong God i wanpela na em i stap wanpela tasol. Dispela i olsem Jisas yet i God nae m i kam daun bihainim laik bilong Papa long mekim rot bilong yumi i go gen long Papa,” Pasto Hegame i tok.

“Jisas i no kam daun long ol wan wan grup i mas pait i go kam long ol yet.

“Sios inap mekim gutpela wok sapos ol i bihain wok tru bilong Krais na strong long pre, lukautim insait long komyuniti bilong ol,” em i tok.

“Jisas i givim ol disaipel pawa (Holi Spirit) long skruim wok em i lusim long ol disaipel.

“Jisas i bringim tok bilong tanim bel, stap holi na bihainim em.

Pasto Hegame i tok PNG i ken kamap gut taim em i tanim bel na bihainim tok bilong God.

Joseph Dawai i raitim