LAS Sande KATOLIK sios long Papua Niugini i holim ol lotu long wan wan ol haus lotu long kantri long tingim Sir Michael Somare.

Kardinal Sir John Ribat bilong Asdaiosis bilong Pot Mosbi i tok Sir Michael i wanpela strongpela Katolik bilip man na i bin stap olsem inap long taim em i dai.

Em i tok Sir Michael, wantaim gutpela bilip, i wanpela gutpela famili man tu.

Em i mekim dispela tok long strongim tingting bilong ol bilip manmeri long bihainim bilip na tingting Sir Michael i bin i gat long em.

Wewak Daiosis, Is Sepik Provins i mekim wankain taim Wewak Daiosis bisop, Bishop Joe Rosynski, SVD, i go pas long ol bilip manmeri na holim wanpela lotu long Groto bilong Akangelo, Santu Michael long Wewak Boys Taun Hill.

Dispela groto em Gren Sif Sir Michael Somare i bin stap tu taim ol i sanapim long 4 Oktoba, 2020.

Sir Michael i bilip long Santu Michael na i makim em olsem Was Santu bilong Papua Niugini.