LONG Sarere Februeri 6 Mary Helpim bilong ol Kristen Peris long Rapolo, Is Nu Briten Provins i bin opim pastoral yia bilong ol wantaim wanpela de bilong fomesen na prea.

Ol patisipen husat i kam long fomesen em ol peris pastoral kaunsel memba, ol katekis long ol sab peris, ol yut lida, ol komunio mista, ol fainens komiti memba na ol liteji kodineta.

Pater Moise i bin opim dispela bung na givim tok i go pas long Strena bilong Rekta Meja 2021. Bihain em i stori long kalsa bilong ol Salesian na pulim tingting bilong ol patisipen long tingim olsem ol i stap namba wan long Don Bosco na ol i memba bilong EPC-Kokopo.

Moa yet Pater Moise i tok Krais Jisas i tasim na muvim ol na ol i mas komitim ol yet long surukim wok bilong em long ol brata na susa insait long ol peris na sab-peris bilong ol

Dispela em i namba tri yia bilong leiti long PNG na Solomon Ailan na het katekis Nikolas Kukup i pulim tingting bilong ol patisipen long tingim wok misin bilong ol, we ol i mas stap na bihainim pasin bilong Blesed Pita ToRot.

Ol i bin pinisim dispela bung wantaim bikpela Misa na ol i tokaut long bilip bilong ol olsem mak bilong komitmen long God insait long ol ministri ol i stap long en.

Makim ol patisipen Siameri bilong Ramale na memba bilong Peris Pastoral Kaunsil Misis Rumu Pukai i tok dispela em i wanpela nupela ekspiriens long olgeta na ol i pilim salens long stap trupela lei misineri.

Dephney Pukai i raitim