PASTAIM bisop bilong Rabaul Asdaiosis, Emeritus Asbisop Francesco Panfilo i go bek long kantri bilong em, Itali.

Em i go bek long las Sande.

Em i bin wok misineri long kantri long las 24 yia.

Bisop Francesco i bin wok olsem sios lida tasol long wankain taim i wok olsem politik man tu.

Em i bin tok em i amamas long kisim malolo tasol i sori olsem wok em i statim i no pinis yet.

Bisop Francesco i save pait long rait bilong ol manmeri long Pomio distrik, Is Nu Briten egensim Malaysia Timba kampani, Rimbunan Hijau (RH) long kampani i mas kisim tok orait long ol papagraun pastaim bipo long em i katim diwai bilong ol.

Em i tok RH i bikhet na i wok long pulim nating graun bilong ol papagraun na katim diwai bilong ol.

Bipo long em i go long Rabaul Asdaiosis, Bisop Francesco i bin wok bisop long Alotau Daiosis long Milen Be Provins.

Asbisop Francesco long taim em wok yet long Rabaul Asdaios i askim ol yangpela manmeri long harim singaut bilong Bikpela.

Em i askim ol long kamap pater, bruda na sista insait long sios.

Bihainim rit long Gutnius bilong Matyu em i askim ol Kristen bilipmanmeri long pre moa olsem ol yangpela manmeri i ken harim singaut bilong Bikpela na i go wok misineri.

Rit long Matyu 9: 35-38 i tok: “...em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman. Olsem na em i tokim ol disaipel bilong en olsem, ‘Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.”

Asbisop Panfilo i askim manmeri long go het yet na pre long ol lain husat i kamap pater, bruda na sista olsem ol tu i ken stap strong long wok bilong ol.

Em i tok long dispela taim, tingting na laik bilong planti manmeri i pas long ol samting bilong graun na ol i givim baksait long Bikpela.

Em i askim ol manmeri long opim hat bilong ol na kisim Jisas Krais long laip bilong ol.

Em i tok taim wantaim strong bilong God  na Bikpela Jisas Krais ol i no inap pret long bungim ol salens bilong graun.

Emeritus Bisop Francesco i bilong lain misineri bilong Don Bosco.