‘MARIMARI bilong God i bikpela, em i redi long kisim bek yumi’. Dispela nius hetlain i bin kamap long las wik.

Ivangelikal Luteran Sios bilong Papua Niugini (ELC-PNG) Papua Distrik Presiden Bisop Reveren Pasto Gundu Guenu Kagl MBE i mekim dispela toktok long Sande sevis long Marimari (Grace) Luteran Sios long las wik.

Long Mande, em i go wantaim ol Het Bisop na ol deleget long Gavman Haus na bung wantaim Gavana Jenerel bilong PNG Gren Sif Sir Bob Dadae na long Tunde God i kisim wokman bilong em.

ELC-PNG bai misim sevis bilong Rev. Gundu Kagl husat em i wanpela senia pasto insait long wok bilong sios na gavman.

Planti taim yumi ol kristen i save mekim kainkain toktok long taim bilong kain hevi tasol yumi mas save olsem God i gat plen bilong em yet na ‘Laip na dai’ em i bilong God wanpela tasol olsem na yumi olgeta i mas tok tenkyu long God i givim yumi Bisop Gundu Kagl.

Ol famili bilong leit Bisop long Dokor ples na Kundiawa-Gembogl distrik long Simbu Provins i kamap pinis long Marimari sios long Pot Mosbi. Sios we Bisop Gundu i bin stap olsem pasto long em, long kisim bodi i go bek long ples.

Leit Bisop Gundu em tu i presiden bilong Papua distrik na sikispela provins bilong Sauten Rijon bai kamap long soim las rispek bilong ol long em.

Long las wik Fraide, Gavana Jenerel Gren Sif Sir Bob Dadae na meri bilong em Emerlina Dadae wantaim ol wokmanmeri bilong em i kamap long Haus Krai long Marimari Luteran Sios long 5 Mail long tok sori long famili bilong leit Bisop na ol kristen memba.

Sir Bob i tok em i kirap nogut long harim olsem leit Bisop Gundu i dai. Em i tok em i bin save long leit Bisop long taim em i bin skul long yunivesiti long 1980 olsem kristen brata i kam inap long taim God i singautim em

“Long taim bilong sori na wari, yumi mas sanap strong long helpim helpim ol femili i kisim strong gen long tok bilong God na ol narapela samting,” em i tok.

Fiunerel sevis bai kamap long Fonde (tude) long Marimari Luteran Sios na long Fraide (tumoro) bai ol famili na sampela hetman na meri bilong ELC-PNG sios i kisim bodi bilong leit Bisop Rev. Pasto Gundu Guenu Kagl MBE i go bek gen long ples bilong em long Simbu provins.

Joseph Dawai i raitim