EM i wanpela taim gen ol Katolik manmeri wantaim ol manmeri bilong ol arapela Kristen Sios i putim sip bilong paia long poret na mekim ol arapela samting long tingim Lent.

Sios i statim taim bilong Lent stat long As (Ash) Trinde long las wik.

Long olgeta yia, sios kalenda i save bihainim laip stori bilong Jisas.

Bikos long dispela as, Ista bai kamap Epril, we yumi bai tingim na selebretim pen, dai na kirap bek bilong Jisas.

Yumi mas redim yet bipo long yumi go insait long bikpela pestode.

Lent i taim tu we manmeri i tingim 40 de na nait sarap o ritrit Jisas i kisim long ples nating (deset).

Jisas i mekim olsem long redim em yet bipo long em i go aut long autim tok bilong God na mekim wok bilong en.

Long dispela taim Jisas i no kisim kaikai o dring inap long Satan i traim em (Metyu 4: 1 – 11).

Ol Kristen manmeri i kisim tu dispela taim long redim ol yet long narapela 40 de (moa long 5-pela wik) bipo long ol i amamasim pen, dai na kirap bek bilong Jisas long Ista.

Long Len, manmeri i mekim sakrifais, lusim ol pasin nogut na askim Jisas long strongim ol na bihainim ol gutpela na stretpela pasin.

Pater Jan Czuba long las Sande i stori long enimal “Carmel” na wanpela treda.

Em i tok yumi inap kisim bagarap long sin na dai sapos yumi olsem dispela treda husat i harim tok bilong Carmel long go insait long tent bilong em na stap insait.

Na man yet i lusim haus sel bilong em na kam ausait we bikpela kol i kisim em, em i sik na dai.

Pater Jan i tok, sin tu i wankain sapos yumi larim em i banisim laip bilong yumi we yumi inap dai na lus long han bilong man nogut.

Em i tok sin i no save bagarapim man long wanpela bikpela samting tasol i stat long ol liklik samting.

Man nogut i save traim manmeri stat long ol liklik samting na bihain i go long ol bikpela samting.

Yumi i mas putim gutpela was long ol traim bilong man nogut.

Paul Zuvani i raitim