MARIMARI bilong God i bikpela na em i redi long kisim bek yumi.

Nogat. God i no save bagarapim plen bilong em, wanpela senia pasto i tok.

Pasto Gundu Kagl bilong Evanjelikal Luteran Sios (ELC) bilong PNG long Gordons long Pot Mosbi i tok God i save lusim belhat taim man i tanim bel na tok sori.

Em i tok God i no save bagarapim plen bilong em tu.

Em i tok dispela i kamap ples klia long taim ol namba wan tumbuna bilong yumi, Adam na Eva i sakim tok.

Em i harim stori na i soim man nogut olsem pawa bilong em i no gat strong.

Em i tokaut moa long kain mekimsave man nogut bai kisim (Buk Stat 3: 14-15).

Pasto Gundu husat i presiden bilong ELC Papua Distrik tu, i tok God yet i laik soim olsem em bai kisim yumi bek long pawa bilong em yet.

Em i salim pikinini bilong em, Jisas Krais i kam na dai long yumi husat i kirap long dai na i kisim bek yumi.

“Sin i olsem wanpela sik i kam insait long yumi ol manmeri tasol yumi gat dispela fridom long rausim dispela sik nogut,” Reveren Gundu i tok.

“Yumi ken pasim dispela sik i stap na bagarapim yumi o askim Jisas long helpim yumi na rausim dispela sik nogut.”

Pasto Gundu i tok sapos yumi laik stap laip oltaim, yumi mas rausim dispela sin i laik bagarapim yumi.

Em i tok yumi kisim Sakramen bilong Baptais na kamap pikinini bilong God.

Olsem tasol wantaim dispela mak, yumi mas soim yumi pikinini bilong Bikpela.

“Sios i sanap long tupela mak, long tok bilong God na long ol Sakramen.

“Wantaim dispela tupela mak, yumi inap wantaim strong bilong Bikpela i pait egensim man nogut.”

Em i tok taim Jisas i kisim baptais long John bilong Baptais, heven i op na pisin i plia i pundaun antap long het bilong Jisas na wanpela maus i tok, ‘Dispela i em Pikinini bilong mi. Mi laikim em tumas. Bel bilong mi i amamas long em.”

Pasto Gundu i tok dispela tok yet i soim olsem Jisas bai harim tok bilong Papa inap long taim em i dai na kisim bek yumi long han bilong man nogut.

Joe Dawai i raitim