MENDI Daiosis long Sauten Hailans na Hela i opim “House of Hope” bilong ol lain husat i
bungim hevi long sut toktok bilong “sorcery accusation related violence” (SARV) o sut
toktok bilong pasin sanguma long dispela wik.

Dispela haus bai lukautim tu ol lain husat i bungim hevi bilong “gender based violence” o
pasin bilong bagarapim ol arapela, planti em ol meri.
Dispela haus o senta em tripela bisop i opim em, Asbisop Douglas Young bilong Mt Hagen
Asdaiosis long Westen Hailans na Jiwaka, Bisop Arnold Orowae bilong Wabag Daiosis long
Enga na Bisop Donald Lippert bilong Mendi daiosis yet.
Senta i stap long St Martin de Porres peris long Pomberel, SHP.
Laik na tingting bilong kamapim dispela senta em Sista Lorena Jenal, Franciscan Sista bilong
Divain Providens (FSDP) bilong Switzerland.
Sr Lorena bai go pas long senta.
Pater Peter Seo, KMS i pater bilong St Martin de Porres.
Pasin bilong bagarapim laip bilong ol arapela bikos long sut toktok bilong SARV i bikpela
tru long kantri, moa long Hailans rijon.
Ol bisop i tok pasin bilong man nogut i wok long bagarapim komuniti na sosaiti na sios
wantaim strong bilong Bikpela i laik wok strong na daunim dispela man nogut.
Bisop Donald I tok bilip long Jisas tasol inap daunim tingting ol manmeri i gat long pasin sanguma.
Long las yia Ogas Daiosis bilong em i go pas long kantri na long holim wanpela protes mas pasin
bilong SARV.
Long dispela taim Bisop Lippert i tok planti laip long Papua Niugini i lus bikos long sut toktok bilong
sanguma na Mendi Daiosis i no narakain.
Em i tok Daiosis i kisim helpim long Missio-Aachen, wanpela NGO grup, long kamapim Haus bilong
Hop (House of Hope) bilong ol lain husat i bungim dispela hevi long go na stap.
Em i tok dispela haus i bilong ol i stap hap taim na bihain ol manmeri i go bek long komyuniti bilong
ol o long hap we ol save ol bai stap seif.
Long wankain taim, ol bisop long Katolik Bisop Konprens (CBC) bilong Papua Niugini na Solomon
Ailan long enuel jeneral kibung (AGM) bilong ol long las yia i tok strong egensim SARV.
Ol i tok ol bai bung wantaim na pait egensim dispela pasin nogut long ol daiosis bilong ol.