EVANJELIKAL Luteran Sios (ELC) PNG i bin makim foapela nupela nesenel kodineta
bilong em long pinis bilong las mun.

Dispela nupela makim i kamap long het opis bilong sios long Ampo, Lae, Morobe Provins.
Ol nupela kodineta em Tony Kudang olsem Yut Kodineta, Bonny Keoka i go het long wok
olsem Luteran Divelopmen Seketeri, Reveren Hans Giergere olsem Evanjelisim Kodineta,
Daniel Suan olsem Edukesen Kodineta.
Makim bilong Wokman Trening kodineta bai kamap long Jun. Reveren Wesley Kerenga i
kodineta bilong dispela opis long dispela taim.
Kamap bilong dispela ol opis i bihainim straksa bilong sios na ol lo i lukautim dispela ol opis.
Long wankain taim, Gutnius Seketeri, Reveren Elymas Bakung i bin tokim ol yangpela long
yut konprens long Simbu i no longtaim i go pinis olsem ol i mas bilip long Jisas Krais na
bihainim em.
Em i tok ol yangpela i no ken lusim taim na raun nating.
Em i tok kantri i bagarap bikos planti pipel i givim baksait long God.
Em i tok ol pipel i no putim God i go pas long laip bilong ol na dispela i lukim planti pasin
nogut i kamap.
Em i askim ol yangpela long tanim bel na kisim God long laip bilong ol.
"Maski sapos bihain yu kamap dokta, tisa, nes na mekim ol arapela wok, yu mas putim God i
go pas long laip bilong yu," Reveren Bakung i tok.