SINSIPAI “Sacred Heart” peris long Tambul Nebilyer long Mt Hagen Asdaiosis i laikim
helpim long kamapim nupela haus lotu.

Ol askim lokal na intenesenel komyuniti long helpim.
Wanpela lokal Sinsipai man, Allan Sumb husat i stap long Divine Word University long
Madang i tok long Facebook olsem ol manmeri i laik kamapim haus lotu long mani mak
bilong US$900,000 (K3 milien).
Em i tok ol i laik kamapim bikpela haus lotu we dispela inap long givim sevis long 10,000
manmeri long peris.
Long wankain taim, Sumb i tok ol peris manmeri i wok long kamapim ol fanresing long
kamapim mani.
Em i tokim ol manmeri olsem liklik wok ol manmeri i mekim inap kamapim bikpela samting.
Em i tok ol bikpela samting i kamap long ol liklik samting.
Sinsipai i nupela peris we i bin kamapim long 2014.
Peris i gat nem bilong strongim Katolik bilip na long kamapim ol wok.
Em i wokim pinis haus pater na pastoral senta na nau yet i plen long mekim konprens senta
na haus bilong ol manmeri long slip.
Asbisop Douglas Young Mt Hagen Asdaiosis i amamas long tingting bilong ol manmeri na i
tok kain projek i bikpela wok na bai laikim bikpela sapot.
Tasol em i tok “Wantaim helpim bilong Bikpela, nogat wanpela samting i hat long mekim.”
Em i strongim tingting bilong ol manmeri olsem sapos ol i laik i go long wanpela longwe
ples, ol i mas tromoi namba wan lek pastaim.
Sinsipai sif, Polgi i bin kisim namba wan misineri i go insait long eria bilong ol long stat
bilong 1960s.