Long mekim wok tru tru em narapela samting gen long wanem save we yumi ol sumatin save
lainim long klasrum.

Dispela eksperiens bilong mi wantaim Wantok Niuspepa long krismas na nu yia holide i givim mi
planti gutpela tingting na save long yusim save we mi kisim long klasrum na putim long wok ples
na mekim wok stret.
Long kamap Jenelis em gutpela wok stret bikos bai yu gat sans long go raun na kisim nius long ol
ples we i gat sampela bikpela ol bung i kamap.
Na tu bai yu gat sans long lukim ol bikpela ol lida man na meri bilong kantri we ol man nating
bai hat long lukim long pablik.
Mi amamas stret long mekim trening bilong mi wantaim Wantok Niuspepa bilong wanem mi
bin kisim planti gutpela trening long hau long kamap gutpela, stretpela na strongpela ripota
long taim bilong raitim ripot long no ken raitim wansait ripot.
Mi bin gat planti sans na eksperiens tu long sait bilong go long ples bilong bikpela bung na kisim
stori na lukim ol sampela ol lida bilong wan wan kampani ol lida bilong kantri tu.
Long stat bilong trening mi bin pret liklik long askim ol manmeri long kisim stori bilong ol tasol
taim sampela wik i kam i go wantaim helpim bilong bos bilong mi na ol wan wok bilong mi i
mekim na nau mi gat strong long go lukim ol manmeri stret long kisim nius stori bilong mi.
Mi lukim stret hau ol jenelis save mekim wok. Sampela taim em ol lain we yu laik kisim nius bai
toktok gut long yu na sampela taim ol i no inap bai helpim yu long infomesen we yu laik save
long em.
Dispela i mekim mi save olsem mipela save lainim long skul em long hau long bai yu go na kisim
nius, hau long toktok long ol man na meri na hau long raitim gutpela nius. Tasol long trening em
bai yu go lukim ol manmeri stret na askim ol gut long kisim stori bilong yu.
Long lukluk bilong mi yet long sait bilong skul em bai yu lainim planti save long hau long ripot na
kamap gutpela jenelis tasol long wok stret long kamap ripota em narapela samting olgeta bikos
em mipela i mekim wok stret bilong wanem samting we mipela lainim long em.
Dispela trening eksperiens em soim mi sampela samting we mi no lainim long klasrum ya mi
lainim taim mi mekim trening bilong mi.

UPNG Jenelis Sumatin Martina Takaneng i raitim