ANNA Akpe i gat 60 krismas na em i kam long ples Sipil long Tsenglapkanem klen long Jiwaka.
Anna i givim laip bilong em long wok olsem klina long Banz taun stat long taim em i yangpela yet.

Em i 22 krismas bilong Anna nau long wok olsem klina tasol em i no pinis yet. Olgeta de Anna i save
kirap long 6 klok long moning na go long taun, na bihain em i lusim taun long 6 klok long apinin na go
bek long haus.
“Bisnis ektiviti long Banz i kamap bikpela na namba bilong ol manmeri tu i go antap tru. Ol pipel i
kam long olgeta hap long Jiwaka, Westen Hailans, Simbu na ol arapela provins i kam na stap long
taun na wok bilong mi i go hat tru. Taun atoriti i helpim tasol i no gat inap mani bilong wok,” Misis
Akpe i tok.
Em i tok Banz taun nau i wok long kamap bisnis senta bilong Jiwaka.
Anna i klinim taun moa long 20 krismas nau na em i tok em i no gat inap strong moa. Tasol em i
laikim tumas ples bilong em (Banz) na em i painim hat long pinis long wok.
Moa yet, Kwin i bin luksave long wok bilong em na Gavana Sir Bob Dadae i givim medal long Anna las
yia.
Ol lokal Memba, Provinsal Gavman o ol arapela bisnis manmeri long Jiwaka i no save luksave long
hatwok bilong Anna. Tasol dispela i no pasim em long mekim wok bilong em. Em i no save kisim pe
long wok bilong em.
Anna i laik bai taun bilong em i luk klin na nais, na ol pipel i ken mekim gut ol bisnis bilong ol.
Anna Akpe em wanpela gutpela ensel wantaim gutpela lewa.

Hoffman Gulgarye i raitim