OL yut bilong Laloki komyuniti long Pot Mosbi i bin kisim skul long plaim dron long taim ol i bin stap
long skul holide.

ExxonMobil PNG (EMPNG) i bin ranim dispela skul aninit long het tok “breaking barriers” o “brukim
banis long kisim moa save”.
Ol 37 sumatin husat i bin kamap long dispela tripela wik woksap i bin lainim ol pikinini long ol dijital
tul we i save strongim pasin wokbung wantaim, impotens bilong gutpela laip bilong ol pipel, na rot
bilong stretim hevi yusim kompyuta, mekim robot na long kontrolim dron.
“Mi tok tenkyu long EMPNG long sapot bilong em na Laloki Wod 1 Kaunsila, George Pote Girisia long
tok orait long mipela long skulim ol dispela pikinini long ol dispela nupela saens, Teknoloji,
Enjiniaring na Metimetiks (STEM) program.” Sophia-Joy Soli, PNG Flying Labs Ko-faunda i tok.
Em i tok tenkyu long ol voluntia bilong EMPNG long stap na lukluk na serim ol ekspirens bilong ol
taim em i skulim ol pikinini.
Ol dispela pikinini i bin soim bikpela laik long lainim ol nupela save.
“Mi amamas tru olsem papa bilong mi i bin tokim mi long joinim dispela trening” Paul Kaluwin husat
i gat 12-pela krismas i tok.
“Pasin bilong strongim ol pikinini long putim moa veliu long skul bilong ol em bikpela samting yumi
mas mekim long PNG. Pasin bilong surukim save i go long ol narapela em impoten long ol
komyuniti,” Pablik Polisi Menesa bilong EMPNG, Sam Koyama i tok.
PNG Flying Lab i bin karimaut dispela trening wantaim sapot bilong EMPNG Saens Embeseda
Program (SAP). Stat long 2013, moa long 5,000 sumatin long PNG i wokbung wantaim SAP na ol
voluntia bilong EMPNG.
Dispela program em bilong pulim tingting bilong sumatin long STEM na kamap ol gutpela na lida
bilong taim bihain.