KAVIENG Daiosis long Nu Ailan i lukim tupela man i kisim odinesen bilong kamap pater na diakon long las wik.

Dispela tupela man em Diakon Gregory Fasokniver husat i bilong Duke ov Yok na Tanga ailan husat i kamap pater na Seminarian Mathew Pulo bilong Lossu na Mangai.

Tupela i kisim odinesen han bilong Asbisop Rochus Tatamai, bilong Rabaul Asdaiosis husat i kamap diakon.

Bipo Asbisop Rochus i bin bisop bilong Kavieng Daiosis na nau em i kamap Asbisop bilong Rabaul.

Fasokniver i namba wan man long ples bilong em long kamap pater.

Tupela i pinisim ol skul long Peter Chanel Koles, Ulapia long Is Nu Briten na Holi Spirit Katolik Tiolojikal Institut (CTI) long Bomana ausait long Pot Mosbi.

Het tok bilong lotu em “Yu salim mi go,” Aisaia 6:8.

Asbisop Rochus i givim skul bihainim Gutnius bilong Santu Luk 5:1-11 “….Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.”

Asbisop Rochus i tokim Fasokniver olsem em nau i lainim pinis wok pater na i mas go aut, givim skul na baptaisim ol manmeri long nem bilong Papa, na bilong Son na bilong Holi Spirit olsem ol manmeri i ken kamap pikinini bilong God.

Long Pulo em i tok em nau i kisim strong pinis na bai stap help man bilong ol pater.

Em i askim ol long “Tis long wanem samting ol i rit, rit long wanem samting ol i bilip na bilip long wanem tok ol i tis.”

Em i tokim ol olsem ol i no inap long gat samting bilong ol yet, ol i mas harim tok bilong Superia na Bisop bilong ol na ol i no ken marit.

Bisop Rochus i tok tenkyu long famili bilong tupela man long ol i redi na tok yesa long givim pikinini bilong ol i go long Bikpela.

Em i tok wantaim wok bilong tupela, Bikpela nau bai yusim tupela long mekim kamap bikpela kingdom bilong em.

Em i askim ol famili na Kristen komyuniti long pre tu long helpim tupela long sanap strong na mekim gut wok.

Planti manmeri long Kavieng Daiosis na Rabaul Asdaiosis i kamap na lukim odinesen bilong Fasokniver na Pulo.