POP Francis i makim meri long holim bikpela wok long Vatican long las wik.

Em i makim Sister Nathalie Beequart husat nau bai wok olsem anda-seketeri (undersecretary) we em bai stap olsem wanpela memba bilong komiti long givim skul tok long Pop long mekim wok.

Sr Nathalie husat i bilong kantri Frans long Yurop bai gat “voting right” long vot insait long ol kibung bilong Vatican na kain ol skul tok Katolik Sios i mas kamapim.

Sr Nathalie i bin wok long Vatican olsem konsalten stat long 2019.

Jeneral Seketeri bilong komiti, Kardinal Mario Grech i tok kain makim Pop Francis i mekim i soim olsem “dua nau i op long ol bikpela senis i kamap long sios.”

Em i tok kain disisen i soim tu laik bilong Pop Francis long lukim moa meri i stap insait long mekim ol disisen long sios.

Dispela makim i kamap bihain long i no long taim i go pinis, Pop Francis i bin sensim sampela lo bilong sios long larim ol meri i holim ol bikpela wok long Vatican.

Las yia i lukim Pop i makim 6-pela meri i stap insait long Fainens Opis bilong Vatican.

Tasol kain disisen i no ken mekim ol manmeri i ting, sios bai askim ol meri long kamap pater.

Narapela man husat Pop Francis i makim long kamap anda-seketeri em Luis Marin de San Martin, wanpela pater bilong Spain.

I no longtaim i go pinis, sios nau i wok long tok pait moa long ol skul toktok bilong sios olsem doktrin, long tok orait long manmeri i bruk na lusim Sakramen bilong Marit na sampela moa