LONG Fonde 4 Februeri, 2021 kalenda bilong Lotu Katolik i soim stori bilong Jisas i salim disaipel bilong em long mekim wok misin.

Em i givim pawa long olgeta disaipel long autim Gutnius bilong helpim manmeri i tanim bel na rausim ol spirit nogut.

Na em i givim strongpela tok long ol i no ken karim kaikai o klos o narapela samting. Ol i go na bilip na putim tras long grasia bilong God.

Dispela Gutnius i mekim mi tingim gen wanpela eksperiens bilong mi taim mi stap yangpela pater na mi mekim wok long Pompabus Peris insait long Wabag Daiosis. 

Em i no tupela yia yet mi stap long Papua Niugini.

Pompabus em i namba wan peris bilong Wabag Daiosis. Em i bin kamap long yia 1945. Em i gat planti autstesen tru. Sampela i stap klostu na planti i stap longwe tru.

Wanpela taim, mi wantaim wanpela seminarian bilong Filipino husat i bin wokim pastoral yia bilong em long Pompabus. Bihain em i go stadi long Bomana seminari na kisim ordo kamap pater na nau em i mekim wok misin bilong em long Wabag Daiosis long lukautim pastoral senta long Par.

Mitupela i bin long longwe autstesen. I gat tripela autsetesn i stap long Baiye sait long Westen Hailans. Mipela kolim dispela hap em i Lowa Lai. Mitupela i go mekim wok pastoral long wanpela wik.

Bipo mipela i go, peris pris, supervais bilong mipela i tokim mipela long karim planti kaikai, ples bilong slip na klos bilong senis. Planti kaikai bilong tin tu mipela i pulamapim long ruksak na karim i go. Beg i hevi tru.

Moning stret, long 5:30, taim ol manmeri i kam misa long haus lotu, mitupela i stat long wokabaut. Kago i planti tru na hevi moa moa yet. Mipela i go i go…..na long hap we, long belo taim samting,  katekis bilong Lowa Lai i kam bungim mipela long rot, bikos mipela i no save long rot i go insait long ples bilong ol.

Wantaim bikpela na hevi ruksak, mipela i wokabaut bihainim katekis i go daun long bikpela Wara Lai.

Wara i strong tru na em dispela wara i go daun na bungim Wara Sepik.

Gutpela bikos katekis i kam. Em i soim rot long mipela i go daun long wara na kalap long hanging bris ol i wokim long rop na diwai bilong bus. Strongpela nois bilong wara i mekim mipela i toktok long singaut bikmaus tru.

Wan wan bilong mipela i kalap long hanging bris na wokabaut i go long narapela sait bilong wara.

Em i namba wan taim bilong mi long wokabaut antap long hanging bris, na daun bilong em i bikpela na strongpela ran bilong wara Lai bai mekim yu pret. Mi tingim olsem, sapos mi pundaun, ol i bai painim bun bilong mi tasol long Wara Sepik.

Bihain long brukim dispela bikpela wara, mipela i brukim narapela wara gen na kalap i go antap long maunten. I no gat gutpela rot.

Mipela i holim long rut bilong diwai na kalap i go antap long maunten. Wantaim bikpela hevi bilong ruksak bilong mi, mi kalap i go antap. Na bihain mipela i wokabaut bihainim kunai ples inap long kamap long namba wan ples.

Mipela i kamap long 5 klok apinun long namb wan ples. Tupela nait mipela i slip long wan wan ples. I gat tripela ples i stap.

Wanpela samting mi laik tokim yupela hia. Olgeta kaikai mipela i bin karim hevi tru long rot, mipela i no kaikai.

Bikos planti kaikai bilong ples i stap, ol i redim bilong mipela. Mipela kaikai dispela kaikai bilong ol. Slip long haus bilong ol.

Taim mipela i lusim ples bilong ol, mipela rausim olgeta kaikai bilong mipela na givim long ol.

Wanem samting Jisas i tokim ol disaipel bilong em, i kamap tru. Mi no bihainim, mi wari tumas olsem na mi givim hevi long mi yet.

Namba tu taim mi wokim patrol long dispela ples, mi no karim kaikai moa. Bikos, God i bin yusim manmeri bilong dispela ples long lukautim mi.