“Mi bai tingim yupela olgeta na bai mi putim Papua Niugini stap klostu long lewa bilong mi”, Asbisop Kurian Mathew Vayalunkal i bin tok dispela taim em i bin toktok long ol pater, ol sista na ol bilipmanmeri long wanpela misa ol i bin mekim long tok tenkyu na tok gutbai long em.

Em i nau wok long redi long go mekim wok misin bilong em long sampela narapela hap. Dispela lotu ol i bin mekim long Sarere, 6 Februeri, long St Joseph Peris long Pot Mosbi.

Kardinel Sir John Ribat, Asbisop bilong Pot Mosbi i bin go pas long dispela lotu. Ol man i helpim em long dispela lotu em Asbisop Kurian Mathew Vayalukal, Apostolik Nunsio bilong Papua Niugini na Solomon Ailan, Asbisop Emertus, Francesco Panfilo sdb, na sampela ol pater bilong Pot Mosbi Asdiosis. Ol sista na ol bilipmanmeri tu i bin kamap long dispela lotu, na ol lain i go pas long singsing long dispela misa em ol St Michael peris bilong Hanuabada.

Bihainim toktok bilong gospel (Mk 1:25-37), Asbisop Kurian i toktok strong long ol kongrigesen long ol i mas balensim wok aposel bilong ol wantaim prea laip bilong ol. “Yupela i mas lukluk na yupela, i mas gat sori long ol arapela man meri na yupela i mas skulim ol long tok bilong God. Em i toktok strong tu long ol manmeri long serim dispela amamas bilong Bikpela, kisim amamas i go long laip bilong ol arapela manmeri na senisim laip bilong ol wantaim ol gutpela pasin.

Long wanpela bung bihain long lotu, Presiden bilong ol Katolik Profesenel Sosaiti, Paul Harricknen; wantaim wanpela mausman bilong ol bilipmanmeri, Greg Soweni; Presiden bilong ol Katolik meri rilijes, Sista Techla Katkata MSC na Kardinel Sir John Ribat, ol i makim ol wan wan ol grup husat i bin go bung long dispela lotu. Long tok amamas bilong ol, olgeta bilong ol i wanbel wantaim tok bilong Nunsio long ol i mas stap olsem gutpela sipsip.

Apostolik Nunsio i tok tenkyu long manmeri long pasin bilong givim, na tu em tok tenkyu long ol bisop long ol hatwok na wok marimari bilong ol, na em i askim long ol prea bilong helpim kamap gutpela wokman bilong God.

Apostolik Nunsio bai lusim Papua Niugini na i go mekim nupela wok misin bilong em long kantri Algeria na Tunisia long pinis bilong dispela mun. Mipela i askim lukaut na blesing bilong God bai i stap wantaim em taim em go long mekim nupela wok misin bilong em.