Long yia 1943 long taim bilong bikpela woa ol Japan kalabusim ol misineri husat i bin stap long Alexishafen na ol narapela peris bilong Madang. Pastaim ol i putim ol long Gayaba, klostu long Alexishafen, bihain ol i bringim ol long Manam ailan. Soldia bilong Japan i was bai ol i no ken ranawe.

Ol Amerika i wok long paitim Japan na balus bilong Amerikai tromoim ol bom long olgeta ples we Japan i stap, na long olgeta bot Japan i ranim. Ol Japan i wok long surik. Long dispela taim ol bos bilong Japan i tok ol misineri i mas lusim Manam na i go long Holandia (tude em Jayapura). Ol Japan i kisim ol katolik misineri; ol pater, ol bruder, ol sista, ol Luteran misineri na sampela hapkas i stap wantaim ol na putim ol long sip ol i kolimYorisime Maru. Ol i 152 pipel olgeta. Dispela sip i lusim Hansa Bay long namba 5 de bilong mun Februeri na i go long Wewak pastaim. Ol i ran long nait, long wanem, ol i pret long ol balus bilong Amerika. Ol i laik i kam long Kairiru Ailan na i hait long de taim.

Wanpela balus bilong Amerika i painim ol klostu long maus bilong Sepik wara na tromoim bom long sip, tasol em i abrus. Soldia bilong Japan i sut long dispela balus na em i ranawe. Taim ol i kam klostu long Wewak san i kamap pinis. De em 6 Februeri 1944 na taim i bin klostu long 7:30 long moning.

Ol i lukim smuk long Kairiru Ailan, em sampela lain balus bilong Amerika i bomim sip bilong Japan. Dispela balus tasol i kirap na i laik go bek long Nadzab long kemp bilong ol, tasol ol i lukim dispela wanpela sip bilong Japan na ol i laik pinisim em. Ol lain em 12-pela balus, na 8-pela bilong ol i wok long tromoim ol bom na sutim sip long masin gan bilong ol.

Ol Japan i tokim ol misineri long ol i mas i stap antap long dek bilong sip, na ol i mas rausim ol waitpela laplap. Ol i mekim olsem na ol i beten long God Papa bai em i kisim ol sapos ol indai long dispela taim. Bisop Wolf i givim absolusio long ol.

Ol soldia bilong Japan ol i sut long balus, na kepten bilong sip i wok long abrusim ol bom. Em i putim sip olsem bai ol balus i no ken bagarapim em olgeta. Fiul na katres bilong ol balus i klostu pinis na ol i lusim sip na i go.

Long dek bilong sip blut bilong ol misineri i ran. Planti bilong ol indai long dispela taim; 27 SSpS sista, 12-pela SVD brude, 7-pela SVD pater, 6-pela Luteran misineri, 7-pela hapkas. Sampela i kisim bikpela bagarap na indai liklik taim bihain, na sampela i stap laip yet sampela lusim blut na indai. Namel long ol em bisop Francis Wolf.

Ol Japan i bringim ol misineri long Wewak, klostu long ples Meni. Ol i karim bodi bilong ol i dai na putim long nambis klostu long solwara. I bin gat 59 bodi bilong dai man na meri olgeta. Ol lain i kisim bagarap na i stap laip yet ol i putim ol long nambis long wanpela sel. Dokta bilong Japan i kam, lukim tasol na i no mekim wanpela samting.

Ol Japan i stretim sip na i tokim ol misineri ol i mas go bek long sip. Ol Japan i laik lusim ol misinari i kisim bagarap tasol ol misineri i strong na ol i kisim ol dispela i stap laip yet. Ol misineri husat indai bodi bilong ol, ol i lusim long nambis. Ol soldia long Japan ol i tok bai ol i putim ol long graun na wokim matmat bilong ol. Tasol ol misineri i no save wanem samting ol soldia bilong Japan i mekim long bodi bilong ol misineri. Bihain long woa ol misineri i no painim ol bun bilong dispela lain. Ol i mas i stap long graun long sampela ples klostu long ples Meni.

Sip i lusim Wewak na i go long Holandia. Long 7 Februeri bruder Alois indai na ol i tromoim bodi bilong em long solwara. Long 8 Febreri bruder Syrus indai na ol tromoim bodi bilong em long solwara long Humbol Bay klostu long Jayapura, tasol wara  i karim em long nambis na ol i planim em long Hotegank em nau ol i stap long em. Bihain ol i go long kem Goya na i stap long hap inap long ol Amerika i kam na ol Japan i ranawe. Ol soldia bilong Amerika ol i kam na kisim ol long 26 April 1944. Ol i putim ol long haus sik na lukautim ol gut. Bihain liklik taim ol soldia bilong Amerika i kisim ol misineri long Finschhafen we ol i stap sampela taim. Ol sip bilong Amerika i kisim ol misineri na karim i go long Australia long Brisbane long wanpela haus sik. Ol i kamap orait, kisim strong na long ya 1946 ol i kam bek long Niugini long wok bilong ol. Taim ol pipel i lukim ol misineri i kam bek ol i krai.

Fr. Jozef Maciolek, SVD i raitim