Mi lukim ol man nogut i kamap mani man na mi mangal long ol samting bilong ol dispela bikhet man.

Ol i no save kisim pen long bodi bilong ol. Ol i strongpela man, na bodi bilong ol i gutpela tasol. Ol i no save karim ol hevi olsem ol arapela man i karim. Ol arapela man i save kisim ol kainkain hevi, tasol dispela kain samting i no save kamap long ol.

Buk song 73:3-5

WANPELA jas i stap long wanpela kantri na em i  gat wanpela draiva i save wok long em, nem bilong draiva em Jon na em i save bilip long God. Planti taim i go pinis tupela wantaim i save go long bus long painim abus. Wanpela taim tupela i stap long bus na jas i  tokim draiva, “Harim, Jon. Mi no klia long dispela bilip bilong yu. Mi no save bilip. Long mi, God na Satan, tupela ino stap. Heven na hel tu i no gat. Mi no bilip long Jisas na tok bilong Baibel.

Tasol mi stap gut. Mi nogat hevi na wari. Mi save amamas tasol, na hevi i no painim mi. Tasol long yu, ol samting i  narakain. Yu save tokim mi olsem, mi wanpela Kristen? Tasol yu no stap gut tumas. Oltaim satan i traim yu na i givim hevi long yu. Yu no ting mi winim yu , a?” Jon i tingting planti stap na em bai i bekim wanem kain tok long jas.

Long wanpela taim tupela is tap long bus na wok long sutim ol abus. Oltaim Jon igat wok long bungim ol abus i dai pinis, na jas i bikmaus, “Jon, maski westim taim long bungim ol abus i dai pinis. Gutmoa yu hariap igo ranim ol abus i kisim bagarap tasol na ino dai yet, nogut ol bai ranawe.” Nau Jon i bungim ol abus idai pinis na i kam bek long bos bilong em.

Em i tok, “Ating nau mi ken bekim askim bilong yu. Yu olsem wanpela abus i dai pinis, na satan i no gat wok long ranim yu na traim yu. Em i save yu bilong em pinis. Mi yet i olsem wanpela abus i kisim bagarap. Em i ranim mi na i laik kilim mi. Long dispela as em givim planti hevi na traim long mi.

Tasol Jisas i stap laip em i win oltaim. Long strong bilong Jisas mi ken win tu.”

“Krais i bin givim bel bilong em long yumi, na maski wanem kain samting i kamap long yumi, oltaim em save mekim yum i win tru,” Rom 8:37