LAS wik Fraide, ol Katolik skul long Nesenel Kepital Distrik na long planti provins tu, i bin opim skul yia wantaim lotu bilong blesim ol tisa na wok bilong ol long 2021.

Long St Peter Chanel peris Erima, ol tisa bilong Maino Heduru na Limana TVet Senta i bung wantaim ol tisa bilong St Peter Chanel Elementeri na Praimeri skul long wanpela spesel lotu bilong ol.

Peris pris Fr Michael i bin go pas long dispela misa. Na ol tisa bilong ol tripela skul wantaim i bin kisim ol hap bilong misa.

Ol tisa bilong Maino Heduru i bin go pas long prosesio na bringim pris i kam insait long haus lotu. Orait ol tisa bilong Limana i singsing na go pas long ol tisa bilong St Peter husat i karim ofa.

Ol yut bilong St Peter Chanel peris i bin go pas long liteji.

Fr Michael i givim naispela stia long homili bilong em long liklik sit bilong mastet diwai. Em i tokim ol tisa long lukautim gut dispela sit bilong bilip bilong ol na bai em i ken gro i go bikpela olsem mastet diwai.

Em i tokim ol tisa long sanap strong long bilip bilong ol long taim ol i mekim wok. Na em i askim ol skul long strongim Relijes Instraksen (RI) long skul.

Anna Solomon i raitim