RAYLEEN Jimake, wanpela yangpela meri Madang long University of Papua New Guinea (UPNG) i go pas long namba tu hap wok bilong ol Madang Sumatin Manam Apil.

Olsem planti arapela yangpela ol i kisim bel kirap taim ol i lukim ol arapela yangpela i mekim ol gutpela wok insait long ol komyuniti.

Rayleen i bin amamas tru long wok bung wantaim wanskul bilong em Kurere Matanzana. Em i tok em i kisim bel kirap long lukim bikpela driman bilong Kurere na em tu i laik helpim long mekim Manam i kamap gut gen.

Narapela bel kirap em olsem em yet tu i laik helpim wantaim ol wok i gat mining long ol Manam komyuniti.

Rayleen i bilip olsem sapos em inap helpim stretim laip bilong wanpela pikinini long wanpela kea senta em i min olsem em i helpim long seivim wanpela jeneresen.

Long Madang dispela yangpela meri i laik lukim moa spes o platfom i kamap bilong ol yangpela long sanap antap na wok long helpim ol arapela husat i gat nid long ol komyuniti bilong ol o arapela komyuniti tu.

Rayleen i laik tu olsem moa yangpela man na meri long Madang i mas holimpas Madang olsem provins bilong ol na long pilim olsem em i ples tru bilong ol. Taim ol yangpela i ken pilim Madang tru tru nau bai ol tu i laik painim ol rot long helpim long stretim ol hevi long Madang.

“Mi bilip olsem wanem liklik samting mipela i mekim nau bai i stap olsem piksa bilong ol arapela long bihainim. Na taim ol sampela i mekim wankain o arapela gutpela wok em nau bai i seivim, lainim na stiaim moa pipel long kamap risponsibel sitisen. Long dispela rot mipela i ken helpim long painim na yusim ol lokal solusen na gutpela pasin long stretim ol lokal hevi bilong mipela,” Rayleen i tok.

Tupela wik i go pinis Rayleen na tim bilong em i pinisim wok bilong putim wara long ol skul long Potzdam, Asuramba na Mangem kea senta. Las wik ol i stap long wanpela program bilong Sumatin Lainim Sumatin long Tusbab Sekenderi Skul. Na nau em i redi long go bek long skul.

Rosa Koian iraitim