MANOKA Igo em i wanpela meri husat i no inap long wokabaut taim em bin 4-pela yia. Dispela i bin kamap taim em bin kisim sik Polio long liklik taim bilong en.

Papa bilong em i bilong Gaire long Sentrel Provinsna mama bilong em i bilong Hanuabada long Nesenel Kepitel Distrik.

Em bin stap long haus wantaim papamama bilong en na i save go long skul. Em bin mekim gred 9 i stap long KilaKila Sekenderi skul i stap na lusim taim em i hat long I go i kam long wilsia.

Taim Manoka i bin stap long hausem bin gat sans long toktok wantaim wanpela sosel wokman. Na long 1986 dispela man i helpim Manoka na kisim em i go long PNG Rehabilitation Centre. Ol i bin givim em ples long slip na stap long hap.

Manoka i bin kisim skul bilong mekim wok wantaim kompyuta taim em i stap insait long Rehabilitation Center. Long 1998 ol lain long Girl Guide Association i kisim em long wok wantaim ol long Konedobu. Taim Manoka i wok na stap long hap em bin bungim man bilong em Hekoi husat i ai pas.

Hekoi em bilong Elevala long Hanuabada. Tupela i bin bung taim ol i bin pilai spot.

Taim tupela i laik marit papamama bilong Manoka na bilong  Hekoi tu i no wanbel. Ol i tok tupela wantaim  bai i no inap long lukautim ol pikinini na tupela yet. Tasol tupela i no harim.

Manoka na Hekoi i gat stongpela tingting olsem bai tupela i inap long lukautim famili bilong tupela. Tupela i gat 3-pela pikinini tasol wanpela i dai. Na tupela i gat tu 7-pela tumbuna pikinini.

Taim Manoka i karim namba tu pikinini meri bilong en, ol lain long Girl Guide Assosiation i salim wanpela leta i kam olsem ol i no laikim em long kam bek gen na wok. Manoka i bin lusim wok long dispela taim na go bek long haus.

Taim em i stap long haus em na man bilong em tupela i save kam long Pot Mosbi long bung wantaim ol lain husat i wankain olsem tupela. Long dispela bung bilong ol i save luksave long narapela na tu ol i save mekim ol samting wantaim helpim bilong ol lain long mekim ol samting ol lain husat i gat gutpela han, lek i save wokim.

Long 2006 Manoka i bin kisim wanpela toksave long Joshia Disability Services long kam wok long hap olsem wanpela resepsenis. Em bin wok long i kam inap long 2016. Bihain em bin kamap wanpela edmin  asisten wantaim Joshia.

Taim Manokai bin wok long hap I stap em bin aplai long Australian Scholaship program na em bin winim dispela skolasip. Manoka i bin go long Australia long kisim skul long 2016 tasol man bilong en i bin sik na em lusim skul long 2018 na kam bek long PNG.

Manoka i bin go skul long kisim digri long helpim ol lain olsem em yet.

Man bilong Manoka i dai long Mei 2018. Taim em i dai Manoka i widro long skul na kam stap long haus. Manoka i bin go bek long Australia long 2019 na pinisim laspela hap bilong skul  na em i greduet.

Emi bin kambek long PNG long June 2019 na em i bin nogat wok nastap long haus tasol.

Taim Manoka i bin stap long ples ol lain ADP opis i askim em long go na wok wantaim ol long Novemba. Nau Manoka i wok olsem wanpela edmin asisten bilong ADP na Wantok Niuspepa I bin amamas long bungim em.

UPNG Jenelis Sumatin Samantha Solomon i raitim