OL YUT long Papua Niugini i soim bikpela laik long Jenda Ikwaliti na wimen lidasip taim 186 yut manmeri i resis long wanpela stori kompetisen o resis we Women Make the Change program bilong UN Women i kamapim long en.
Dispela resis i bin op long 26 Oktoba 2020 na UN Women na Post Courier i tokaut long ol wina bilong dispela resis long Tunde.
Nem na krismas bilong ol dispela winmanmeri em;
- Konjim Andreas, meri, 17 krismas bilong Westen Hailans provins
- Ricard Isaac, man, 19 krismas bilong Is Nu Briten
- Rebecca Gapi, meri, 19 krismas bilong NCD
- Jerome Sesega, man, 26 krismas bilong NCD
UN Women i bung wantaim Dipatmen bilong Komyuniti Developmen na Relijen na ol arapela ki patna long makim ol dispela wina antap long esei ol i raitim, ples ol i stap long en, jenda na krismas bilong ol.
Ekting Het bilong Ejensi bilong UN Women long PNG, Caroline Nyamayemombe i tok, ol i luksave insait long dispela stori resis olsem ol yangpela manmeri long PNG i gat planti toktok long mekim long jenda ikwaliti long kantri na ol i amamas long skelim tingting bilong ol long helpim sampela salens kantri i wok long bungim.
“Mipela i amamas tru long harim ol tingting bilong ol yanpela long jenda ikwaliti na apim namba bilong ol lida meri long PNG,” Caroline Nyamayemombe i tok.
UN Women i tok tenkyu long olgeta yangpela manmeri husat i stap insait long dispela resis.
wantokniuspepa.com