WILLIAM Fey, OFM Cap. pastaim bisop bilong Kimbe, Wes Nu Briten i dai.

Em i dai long Franciscan Capuchin (OFM. Cap) Pittsburgh, Pennsylvania Provinsel Haus bilong ol Friary long Amerika.

Em i gat 78 krismas taim em i dai. Em i dai long las wik long sik coronavirus (COVID-19).

Ol OFM Cap pater na brude long PNG provins i sori na tokaut long dai bilong em.

Bisop William i ritaia long wok misin long 2019 na i bin go bek na stap long kantri bilong em, Amerika inap long taim em i dai.

Long Oktoba 2018, Bisop William i amamasim 50 yia anivesari bilong em long kamap na stap wok olsem pater.

Bisop William i kisim odinesen bilong em long kamap pater long 19 Oktoba, 1968.

Em i stat long elementeri skul i go inap long em i kamap pater na i go moa yet long pinisim na kisim dokta digri (PhD) long filosopi long Oxford Yunivesiti long Inglan.

Em i pinisim ol skul bilong em long kamap pater long Amerika yet.

Olgeta dispela samting em i mekim wantaim laik em i gat long God na long sios.
Ol lain OFM Cap pater na brude i tok arere long laik bilong em i gat long Bikpela, em i gat laik bilong skul na i laik tis na trenim ol yangpela long kamap misineri.

Long 1987, em i kisim singaut long kamap misineri na kam long Papua Niugini.

Bihain long dispela em i go long St Fidelis Koles long Madang long 1988 long luksave long sindaun bilong ol lokal sumatin.

Long 1989 ol Capuchin superia bilong em long Mendi i salim em i go long Pot Mosbi.

Em i stap tisa long Katolik Tiolojikal Koles (bipo Holi Spirit Mesa Seminari), Bomana.

Em i tisa long hap inap long 2007 we ol superia bilong em i singautim em long kamap Kaunsila bilong Vais Provinsal Minista bilong OFM Cap na i stap long het opis long Mendi, Sauten Hailans Provins.

Bikos long ekpiriens na save bilong em, Pop i makim em i kamap bisop bilong Kimbe Daiosis, Wes Nu Britan.

Long 2019 Pop Francis i makim Pater John Bosco Aurama olsem nupela bisop bilong Kimbe.

Bisop William i ritaia taim Pater John i kisim ples olsem bisop bilong Kimbe.