OL Sosaiti bilong Divine Word (SVD) misineri i amamasim 125 anivesari bilong ol long kamap na wok misin long Papua Niugini long las wik.

Ol i holim dispela selebresen long St Paul’s Peris long Mt Hagen, Westen Provins.

Planti ol daiosisen na ol relijus kongrigesen wantaim ol lei manmeri long Hailans rijon i kamap na amamas wantaim ol lain SVD.

Asbisop Douglas Young long Mt Hagen Asdaiosis i bin go pas long “thanksgiving” misa.

Brude Victor Kanarski bilong SVD Provinsel Kaunsil i ritim tok amamas pas bilong SVD provinsel, Pater Jose Orathinkal husat i no bin inap long stap.

Asbisop Young i givim liklik histori bilong kamap bilong ol SVD na stap bilong ol long PNG.

Pater Agbeyome-Akpah, SVD i tok ol i holim liklik selebresen bikos ol i laik bihainim skul tok bilong faunda bilong ol em Pater  Arnold Janssen.

De tru we ol SVD i sua long Tumleo ailan long Aitape em long 13 Ogas, 1896 tasol ol i holim selebresen bihainim Mama Karim De bilong Pater Janssen long 15 Jenueri.

Bihain long ol i sua long Aitape, ol i go long Madang na sua long Alexishafen we ol i kamapim hetkwata bilong ol.

Maski liklik lain waitmanmeri i kamap pinis long kantri, ol SVD i kamap long taim planti hap bilong Papua Niugini i no save long ol waitman na pasin bilong ol.

Ol i bringim tok bilong God tasol long wankain taim i bringim ol sosel sevis olsem helt, edukesen, egrikalsa na bisnis tu.

“Mipela i gat wok bilong tok tenkyu long God long salim ol misineri i kam,” Asbisop Young i tok.

“Bikos long hatwok bilong ol misineri bipo, yumi nau kamap memba bilong Katolik, namba wan sios na sios bilong olgeta hap bilong graun.”

Ol SVD i wok long ol daiosis olsem Madang, Wewak, Wabag, Mt Hagen, Kundiawa, Goroka na Pot Mosbi.

I gat olsem 68 SVD pater, 12 relijus na 22 seminarien i stap long kantri.

I gat olsem 18 SVD nesenel pater na brude na tripela i stap olsem tripela diken long kamap pater.

Simon Mokot i raitim