LONG olgeta hap graun save na tingting i wok long go antap tasol dispela bai i no inap givim gutpela laip long ol pipel, wanpela pasto i tok.

Papua New Guinea Christian Leaders Alliance (PNGCLA), HIV and AIDS Kodineta Pasto Kasi Tau i tok em i tru olsem save ol manmeri i kisim long skul tasol dispela i no kamapim gutpela sindaun sapos ol i no kisim Jisas long laip bilong ol. “Sekula bilong PNG edukesen dipatmen i tok long Kristen veliu edukesen tasol taim mi ritim dispela ol edukesen metirel (buks), ol i no gat wanpela Kristen veliu edukesen program i stap insait,” em i tok.

“Ol pikinini i no kisim save long tok bilong God yumi bai stap olsem wanem.”

Pasto Kasi, husat i bin wok pastaim olsem skul edministreta bilong Sentral provins i tok planti ol skul insait long kantri i no lainim ol pikinini long tok bilong God long klasrum na dispela inap bagarapim sindaun bilong ol long bihaintaim.

Em i tok nuklia bom em i wanpela piksa, we God i givim save na tingting long man tasol man i yusim dispela save long apim nem bilong ol yet na bagarapim narapela man.

“As tru bilong yumi olgeta manmeri na ol pikinini i stap hia long graun, em long litimapim nem bilong God wanpela tasol na laikim ol brata bilong yumi olsem yumi laikim yumi yet,” em i tok.

Pasto Kasi i tok strong long Edukesen Dipatmen long lainim Kristen veliu insait long olgeta skul bilong PNG.

Joseph Dawai i raitim