“TAIM ol i pinis long kalabus na kam ausait husat bai i stap long helpim ol i go bek insait long komyuniti bilong ol?”

Dispela em askim bilong Bethleen Kasap wanpela meri husat i wok long helpim ol kalabus long Bundaira Haus Kalabus long Kainantu, Isten Hailans Provins.

Bethleen i tok em i gat bilip long seken sans bilong ol kalabus man na meri.

“Taim ol i go insait long kalabus, yumi save tok ‘ol kalabus’ na taim ol i kam ausait yumi save tok ‘ol eks konvik’, Bethleen i tok.

“Tasol bikpela samting em, ol tu i man na meri wankain olsem yumi na ol i ken senis,” dispela meri Madang i tok.

Em i bin luksave long nid bilong ol kalabus taim em i stap insait long hevi bilong marit bilong em yet na painim rot bilong helpim em yet. Bethleen i bin yusim kot sevis long helpim em long hevi bilong em.

Bihain em i bin yusim dispela ekspiriens bilong em long helpim ol arapela meri husat i stap long wankain hevi wantaim man bilong ol long yusim kot sistem long stretim hevi. Sampela taim dispela wok helpim i save kisim em i go long Bundaira Haus Kalabus.

Long Bundaira Bethleen i bungim ol arapela man na meri husat i nidim helpim.

Taim em i bung wantaim wanpela insait long haus kalabus em i save statim wok bilong em wantaim prea na bihain wokim liklik kaunseling. I go moa yet Bethleen i luksave olsem taim ol i kam ausait ol bai i nidim helpim. Wanpela dispela helpim em mani bilong kirapim liklik wok bisnis.

Bethleen i tok olsem em i luksave olsem planti i save go kalabus long liklik samting olsem ol i stil. Sampela as bilong stil em long bungim mani long baim skul fi.

Olsem na em i stat long putim sampela liklik mani long helpim husat i nidim helpim bilong em. Tasol em i no save tokaut long dispela. Em i save redim ol long save bilong statim na ranim liklik bisnis, long seivim mani long benk na sapos ol i laik rejista wantaim Invesmen Promosen Atoriti.

“Planti ol lain mi helpim em ol lain papamama i dai pinis, o ol i kam long haus we papa na mama i no sindaun gut o ol meri man bilong ol i dai pinis.

“Sampela i ting mi mekim dispela wok bilong kisim mani. Tasol mani em i no astingting na mi mekim dispela wok,” Bethleen i tok.

Em i tok em i mekim liklik wok bilong em bikos i gat nid. Planti lain i lukim Kainantu olsem wanpela kauboi kantri tasol dispela meri Madang i tok em i no tru. Ol pipel long dispela ples em ol sampela gutpela pipel stret.

Yes i tru em i hat long mekim kain wok sapos i no gat mani. Tasol mi save mekim ol liklik wok konsalten long ol husat inap long peim sevis bilong mi na mi yusim dispela mani long mekim wok helpim bilong mi,” Bethleen i tok.

Em i gat wanpela haus long Pot Mosbi tu we em i rentim. Na mani em i kisim long rent i save helpim tu wok helpim bilong em.

Bethleen i bin wok wantaim ol bisnis haus bipo long Pot Mosbi, Kundiawa na Lae na dispela ol ekspiriens tu, em i yusim long helpim ol kalabus long sait bilong kirapim na ranim ol liklik bisnis.

Long Desemba Bethleen i bin askim Smol na Midium Entaprais Kopresen long helpim em long ranim liklik bisnis trening long Bundaira Haus Kalabus na em i kalap nogut taim ol i singautim em i go long wanpela trening long Bomana Haus Kalabus long Pot Mosbi. Dispela trening em bilong ol trena bilong Koreksenel Sevis bilong lainim ol kalabus long kirapim na ranim liklik bisnis taim ol i lusim haus kalabus.

Wok bilong em sampela taim i save bringim em i go lukim na stori wantaim sampela kalabus long Bihute Haus Kalabus tu long Goroka.

Em i tok ol kalabus i nidim seken sans na sapos yumi inap helpim ol yumi mas helpim ol.

Nau em i wok aninit long grup nem bilong em Kasap Ex-Convicts Rehabilitation Service. Em i wok em yet na i tok sampela i laik helpim em long wok tasol em i nogat mani long peim ol.

Em i amamas long luksave em i kisim long provinsel gavman bilong Isten Hailans na long Koreksenel Sevis.

Em i tok tu olsem bikpela samting olsem ol kalabus i mas kisim sans long go bek long skul na ol i ken helpim ol yet long komyuniti.

Rosa Koian i raitim