YUNAITET Nesen Meri o UN Women aninit long Meri Mekim Senis program i opim wanpela singaut long ol Non-Gavman Ogenaisesen (NGO) long mekim proposal long sapotim lidasip developmen na mentosip bilong ol yangpela meri long Papua Niugini.

Bikpela tingting bilong dispela em long mekim ol yangpela meri i kamap lida. Na dispela program bai helpim ol yangpela meri tu long toktok moa long jenda ikwaliti na wimens empawamen long komyuniti bilong ol.

Strongim na bungim ol bel kirap meri na ol meri long olgeta hap insait long lidasip em i namba wan wokmak bilong ol Meri Mekim Senis program. UN women wantaim UNDP, Gavman bilong PNG na Gavman bilong Atonomus Rijon bilong Bogenvil i karim aut dispela program wantaim fanding i kam long Gavman bilong Australia na Nu Silan

Long kamapim dispela, bikpela lukluk na sapot i mas i go long ol yangpela meri husat i bai kamap lida.

“Mipela i save mekim kain  toktok olsem ol yut em ol lida bilong tumora, tasol i gat planti ol yangpela insait long komyuniti we i kamap lida pinis na i wok long lidim ol manmeri na pikinini long kain kain rot,” Carolyn Nyamayemombe, mausmeri bilong UN Women long kantri  i tok.

Dispela singaut i op long ol NGO long intenesenel na nesenel we i gat opis bilong ol long PNG. Ol NGO i mas aplai wan wan o ol i ken bung wantaim narapela long kisim grent mani inap long USD $200,000.00.

Ol i mas salim eplikesen i go long dispela email: This email address is being protected from spambots. You need JavaScript enabled to view it. bipo long Mande 22 Janueri 2021.