LAS wik ol sista (nun) bilong Cavanis “Jesus the Good Shepherd Community” bilong Katolik sios i holim wanpela wik sarap (ritrit) long Nazareth Prea Haus ausait long Pot Mosbi.

Ol i ksim dispela taim long glasim wokabaut bilong ol long 2020 na long tingting long wanem samting wan wan bilong ol bai mekim long strongim singaut bilong ol olsem ol wok meri bilong God.

Dispela ol lain sista i save wok long Bereina Daiosis long Sentral Provins.

Arere long prea laip na tokaut long tok bilong God, ol i save tis, ranim ol skul na wok nes long ol haus sik.

“Mipela i kisim dispela taim long sarap na prea na skelim wokabaut bilong mipela long 2020 wantaim Jisas Krais,” Sista Anna Pigozzo, superia bilong ol i tok.

“Mipela i yusim stori bilong Jisas i toktok wantaim wanpela meri bilong Samaria long helpim mipela long skelim tingting.

“Long dispela stori Jisas i tok em yet i laip long wanem em yet i dispela wara i gat laip.

“Long Jisas yet yumi gat rot na hop long go long God Papa.”

Sista Anna i tok ol i kisim dispela taim tu long tok tenkyu long God Papa long blesing bilong em na long strongim ol long 2020.

Ol i tok Jisas i stap wantaim ol long wokabaut bilong ol, moa yet long ol Sakramen olsem Yukaris.

Bikpela wok misin bilong ol sista em long wok wantaim ol pikinini na ol yut.

Em i skulim ol yangpela long kamap gutpela ol mangi insait long famili olsem Jisas i gutpela pikinini insait long Holi Famili.

Jisas Krais, maski i pikinini bilong God na i God yet, tasol i daunim em yet long bihainim tok bilong Mama Maria na Josep.

Taim ol famili i bihainim stap bilong Holi Famili, famili na komyuniti bilong yumi bai stap gut.

Long Krismas yumi tingim na amamasim dispela de God Papa i salim pikinini bilong em i kam stap wantaim yumi olsem man.

Long Krismas Jisas Krais, Emmanuel, em yumi tingim God i stap wantaim yumi.

“Mipela i pre olsem lait bilong Jisas Krais i ken stap wantaim olgeta manmeri.

“Jisas yet i bret, wara na lait bilong laip. Long em yet yumi ken save yumi gat laip i stap gut oltaim oltaim.”

Pater Ambrose Pereira, SDB, i bin givim dispela ritrit long ol Cavanis Jesus the Good Shepherd sista.

Sr Anna Pigozzo i raitim