HET bisop bilong Evanjelikal Luteran Sios bilong Papua Niugini (ELC PNG) Reveren Dokta Jack Urame i opim wanpela nupela sios long Warakar, Jiwaka long Sande 27, Desemba, 2020.

Bisop Urame husat i go wantaim famili bilong em long Jiwaka bihain long askim bilong Helen Mugang Kopunye, meri husat i bin wokim Luteran haus lotu.

Bisop i katim ribon na i tokaut long nem bilong nupela sios olsem Hefanang Memorial Haus Lotu bilong Mugang Paris.

Ol sios lida na ol komyuniti lida bilong Komblo na Sekaka hauslain i tok tenkyu long Misis Kopunye long wokim kain haus lotu we planti manmeri inap lotu insait.

"Dispela em i olsem pikinini sid tupela misinari em Mugang (papa bilong Helen Kopunye) na Hefanang i planim long Jiwaka we i karim kaikai,” Kopunye i tok.

"Yumi mas planim moa sid na em i mas karim kaikai. Gutnius bilong Jisas Krais i mas go long olgeta ples," Bisop Urame i tok.

Seket lida na sif bilong Jiwaka provins Philip Kapal i askim ol manmeri long senisim pasin bilong ol long Niu Yia (2021).

"Mi les long lukim ol yangpela i dring bia o paia wara na simuk spak brus na sanap nating long rot na maket.

"Yumi mas lukautim dispela wanpela laip bilong yumi, stap isi wantaim famili long haus.

"Yumi mas putim God na famili i go namba wan bikos em i as bilong olgeta samting.

"Sapos yu save spak na pairap long rot, yu askim yu yet.

“Hamas mani o kago yu i gat, sapos yu nogat orait yu mas sem na go wok strong long graun," Kapal i tok.

Misis Kopunye i tok tenkyu long man bilong em Peter Kopunye (wanpela biknem loya), pikinini man bilong em Nelson na Charles (tupela loya) na ol arapela famili bilong em na ol sios memba na kapenta long helpim em long wokim haus lotu.

"Mipela i statim haus lotu long 2017. Bihian long tripela yia yumi opim sios.

"Luteran sios i bin kam hia long Sigri long 1961 na long Kala long 1963.

"Mipela i bin stap aninit long Sigri Emmanuel peris na go bikpela.

"Long 2009 mipela i kamapim Mugang peris na nau mipela i gat sevenpela haus paia," Kopunye i tok.

Wilfred Kulno, seketeri bilong Not Waghi Memba Dokta Fabian Pok i makim K5000 long givim i go long sios.

Seketeri bilong Gavana Jeneral Bill Toraso, tupela pastaim Not Wagi Memba Yimbal Aipe na Michael Mas Kal stap tu long taim ol i opim sios.

Bisop Urame i askim tu long gavman i mas wok bung wantaim sios long divelopim komyuniti, distrik na provins wantaim infrstraksa olsem rot, bris, skul, na haus sik.