OL sumatin bilong Rarongo Yunaitet Tioloji Koles long Kerevat long Is Nu Briten Provins i laikim manmeri long gat gutpela sindaun.

Pasto sumatin, Kerron i tok arere long skul bilong ol long manmeri long bilip long God, ol i askim tu long ol manmeri i mas gat gutpela sindaun long laip bilong ol long hia long graun.

Em i tok long ol manmeri i gat gutpela laip, ol i mas gat gutpela helt, save na bilip.

Em i tok 2020 i wanpela hatpela yia long wol, moa yet long kantri.

Em i tok dispela em bikos long kamap bilong sik coronavirus (COVID-19).

Kerron it ok long helpim komyuniti long givim gutpela skul long sait bilong helt, koles i bin helpim long kamapim ol awenes wok.

Em i tok koles i save go aut na mekim awenes long ol manmeri long ol i mas gat bihainim gutpela rot oltaim long abrusim sik.

Dispela long ol rit em ol i mas wasim han olgeta taim, stap longwe long ol narapela, putim pes mask, no ken bung tumas long wanpela hap na sapos ol i pilim sik, ol i mas go sekap o kisim malolo na stap longwe long ol arapela.

Inap long pinis bilong Novemba las yia wantaim Australia Aid, Yunaitet Sios i bin inap long mekim awenes long 14,500 manmeri long Is Nu Briten.

Tupela patna i bin givim 687 pamlet long ol manmeri, 2350 posta, 6-pela bena na 3840 bar sop.

Tupela i bungim 11 kongrigesen, 14 komyuniti na long Is Cape Coast, Milen Be, tupela i bungim 6-pela skul.