YIA 2020 i hatpela yia long wok bilong autim tok bilong God na long strongim bilip bilong manmeri.

Bikpela salens long wok bilong sios na long bilip bilong ol manmeri long God em long kamap bilong sik coronavirus (COVID-19).

Papua Niugini i bin save long kain salens dispela sik i bin inap long kamapim inap long mun Mas inap long mun Jun taim gavman i luksave olsem em i mas mekim wanpela samting na pasim kamap bilong dispela sik.

Dispela long taim ol helt atoriti i painimaut olsem wanpela meri i gat COVID-19 na i stap long Is Nu Briten.

Long dispela taim gavman i kamapim Stet ov Imejensi (SoE) na pasim ran na wokabaut bilong ol manmeri insait long kantri na long ol manmeri i kam insait o i go ausait long kantri.

Dispela i lukim hevi bilong sik i putim bikpela salens long laip bilong ol manmeri na bilip bilong ol tu wantaim.

I gat tambu long manmeri i bung na lotu wantaim.

Yumi bai lukluk bek long sampela ol bikpela wok i bin kamap long wan wan ol bikpela sios olsem Yunaitet, Englikan, Luteran na Katolik i mekim long yia.

Yunaitet Sios

No ken pret long kain kain traim na hevi, Reveren Garo Kilagi, Jeneral Seketari bilong Yunaitet Sios long Papua Niugini i tok.

Em i tok manmeri i no ken pret long bungim ol salens long laip bikos Jisas, husat i Sevia na winim olgeta traim inap helpim yumi long winim.

Em i tok bikpela samting em yumi manmeri i mas i gat bilip na tras long em.

Em i mekim dispela tok long taim sios i bin redi long holim enuel jeneral miting (AGM) bilong em long Hela rijon long Novemba.

Em i mekim dispela tok tu long Wantok Niuspepa long taim kantri na wol wantaim i wok long bungim planti salens na hevi long kamap bilong coronavirus (COVID-19).

“Yumi i no ken tingting planti na pret long ol traim na hevi i kamap,” Reveren Kilagi i tok.

“Bikos Bikpela Lord yet i tok olsem em bai helpim yumi.

“Bikpela i winim olgeta traim, maski sapos dispela i min pen na dai, yumi i mas gat bilip na tras long em long olgeta taim.

 “... Yupela i mas save gut long mi, mi God tru. Mi antap tru na ol lain manmeri i stap aninit long mi. Long olgeta hap bilong graun, mi stap namba wan tru,” (Buk Song 46:10).

Narapela bikpela bung bilong sios em long 49 Yunaitet Sios Felosip bung bilong ol meri long Papua Niugini long Pot Mosbi long Oktoba.

Susan Setae, wanpela Yunaitet Sios lida i tok tenkyu long God long ol lidameri long Yunaitet sios (Methodist) na Papua Ekalesia i bung na mekim disisen long strongim laip bilong ol meri long sios.

“Dispela em i wanpela taim we mi i no inap long lus tingting na dispela bai stap long tingting bilong mi olgeta taim,” em i tok.

“Tude, ol meri long Yuaitet Sios long Papua Niugini na Solomon Ailan i wok long amamasim 49 anivesari, sampela ol meri lida i stap yet long dispela taim.

“Mi amamas na tok tenkyu long God long lidasip we i givim tok tenkyu long mi.”

Katolik Sios

Asbisop Anton Bal bilong Madang Asdaiosis na Bisop Otto Separy bilong Bereina Daiosis i kamap presiden na vais presiden bilong Katolik Bisop Konprens (CBC) bilong Papua Niugini na Solomon Ailan.

Tupela bisop bai wok long dispela posisen long tripela yia.

Ol bisop i makim tupela bihain long 2020 CBC enuel jeneral kibung we i bin kamap long Pot Mosbi long Oktoba.

Tupela bai stap long lukim ol wok bilong het tok Katolik Leiti: Holi na Kamapim Wok Misin i kamap gut long ol dispela yia.

Dispela tok i tokim ol manmeri long kamap gut, kamap holi na redi long go aut na autim Tok bilong God.

Dispela singaut i go long olgeta Kristen manmeri long ol i mas wok bung long strongim dispela tok.

Ol memba bilong palamen i bagarapim ol manmeri long dispela Krismas, Opis bilong Katolik Bisop Konprens (CBC) bilong Papua Niugini na Solomon Ailan i tok.

Jeneral Seketari bilong CBC, Pater Giorgio Licini, i tok dispela krismas i no gat gutpela amamas bikos ol memba bilong palamen i pasim helpim i mas go long stretim sindaun bilong ol manmeri.

Em i mekim dispela tok long Krismas toktok bilong em.

“I no gat wanpela man i save yumi bai pinisim yia olsem wantaim hevi bilong COVID-19 na pilai politik,” Pater Giorgio i tok.

“Ol manmeri i bungim yet ol hevi long olgeta de long ol i gat gutpela helt, edukesen na ol bikpela sevis ol i mas i gat.

“Mipela i pinisim dispela yia long narapela kain wei.”

Sir John Kardinal Ribat, Asbisop bilong Pot Mosbi Asdaiosis i tok long stat bilong yia, yumi i bungim taim nogut bilong sik coronvirus (COVID-19).

Yumi i wok long mekim ol askim olsem, “Wanem samting i wok long kamap?”, “Wanem taim dispela sik bai pinis?”, “Dispela em trupela sik o samting man yet i kamapim?”Kardinal Ribat i tok.

Tasol em i tok maski long dispela ol hevi, yumi save God i stap wantaim yumi olgeta taim.

Long Oktoba Bisop Rochus Tatamai i kamap namba wan lokal asbisop bilong Rabaul Asdaiosis na Bisop Dairus Karusz i lusim Goroka Daiosis na kamap bisop bilong Bogenvil Daiosis bisop. Dispela em bihain long Pop Francis i makim ol.

Luteran Sios

Long Evanjelikal Luteran Sios (ELC) i sanap strong insait long senis bilong tude, sios i mas holim ol veliu na strong bilong en insait long wok bilong en. 

Asisten bishop bilong ELC PNG, Reveren Lukas Kedabing, i mekim dispela tok long ai bilong Nasuapum Luteran Kongrigesen konprens long Banzi insait long Wampar LLG, Huon Distrik, Morobe Provins long Jun. 

Bishop Kedabing i tok, wanem samting i mekim veliu na strong bilong sios em pasin bilong rispek, bihainim tok bilong God na ol gutpela pasin insait long kalsa.

Em i tok planti pipel i no sanap strong na bihainim tok bilong God na bilip ol i gat long baptais ol kisim.

Sapos ol i no holim strong Tok bilong God dispela bai i no inap givim laip long ol.

Em i tok ol senis teknoloji na sosaiti i mekim ol manmeri i givim baksait long bilip na Tok bilong God.

Em i salensim ol sios memba long sanap strongim long ol skul Jisas i givim.

Anglikan

Bisop na pastaim het bilong Anglikan sios long Papua Niugini, Asbisop Allan Migi i dai.

Em i dai long Oktoba long ples bilong em long Gasmata, Kandrien Gloucester long Wes Nu Briten provins bihain long em i bin sik sampela taim.

Em i bin wok long het opis long Lae, Morobe Provins taim em i risain na lusim wok long las yia na go bek long ples bilong em.

Anglikan sios long Papua Niugini i tok sori long dai bilong Bisop Migi.

Bisop Migi i wanpela gutpela poroman bilong Australia Anglikan sios na sios i salim sori bilong em tu long famili bilong Migi.

Het bilong bilong Aglikan sios long Australia, Reveren Geoffrey Smith i tok, “Mi givim tenkyu long God long Bisop Allan Migi, husat mi save long em long las 30 yia.

“Em i wanpela man husat i gat bikpela strong na pasin bilong givim sevis long Bikpela wantaim lewa bilong em.

Anglikan Bisop Ekseketiv Dairekta, Reveren John Deane i tok Asbisop Allan i wanpela daunpasin man, husat i wanpela strongpela wokman bilong Bikpela na i wok strong long autim tok bilong Bikpela long wok bilong em.

Paul Zuvani i raitim