“STORI bilong Jisas Krais i kamap, em i olsem: Mama bilong en, Maria, ol i makim em pinis long maritim Josep. Tasol tupela i no stap wantaim yet, ol i lukim Maria i gat bel. Holi Spirit tasol i bin mekim na Maria i gat bel,” (Matyu 1:8).

Dispela stori i soim klia, Jisas em i pikinini bilong God.

Holi Spirit tasol i bin mekim na Maria i gat bel. Jisas i no pikinini bilong Josep. Nogat.

Sampela man ol i laik paulim tok bilong God na ol i tok, “Jisas em i pikinini bilong man tasol. Em i pikinini bilong Josep na Maria. Dispela tok i no tru.

Buk Baibel i no tok Josep i bin stap wantaim Maria na Jisas i kamap.

Taim Josep i lukim Maria i gat bel na i save, dispela pikinini Maria bai karim, em i no pikinini bilong em. Olsem na Josep i tingting long lusim Maria.

Josep i no bikmaus na krosim Maria na paitim em. Nogat. Em i sori long Maria na i laik lusim em isi tasol.

Maria i save em bai karim Pikinini bilong God olsem na em i no pret. Em i amamas na stap isi na litimapim nem bilong God.

Maira em i no tokim Josep long wanem samting i bin kamap long em.

God i helpim Maria gut tru long wanem em inap tokim Josep long wanem samting i bin kamap long em.

God i helpim Maria gut tru long wanem em i laik inapim tok bilong em long gaden Iden.

Baibel long Buk Stat: 3:15 i tok: “Pikinini bilong meri bai krungutim het bilong yu na bai yu kaikai lek bilong em.”

God i salim ensel i kam long Josep. Ensel i tok, “Josep, yu man bilong lain bilong Devit, yu no ken pret long kisim Maria olsem meri bilong yu. Harim, dispela pikinini i stap long bel bilong em, em Holi Spirit i bin givim. Bai em i karim pikinini man, na yu mas kolim nem bilong em Jisas, long wanem, em bai i tekewe sin bilong ol manmeri na kisim bek ol,” (Matyu 1:20-21).

Josep i harim dispela tok na em i no lusim Maria. Nogat.

Em i kisim Maria olsem meri bilong em. Josep em i wanpela man i save bihainim tok bilong God.

Sampela taim yumi tu i gat wanpela tingting na yumi ting, em i gutpela tingting tru. Bihain God i soim yumi, dispela tingting i no gutpela, em i no orait.

Yumi bai mekim wanem? Yumi bai bihainim tok bilong God o yumi bai bihainim tingting bilong yumi yet? Gutpela moa yumi bihainim pasin bilong Josep na blesing bilong God i stap wantaim yumi.

“Litimaptim nem bilong God i save i stap antap tru. Na long graun ol manmeri i ken stap bel isi, God i bel gut long ol,” (Luk 2:14).

Sios kolom wantaim Tupex Jerry