WOK bilong Ministriel trening bilong Evanjelikel Luteran Sios (ELC) PNG bilong tude na tumora bai go olsem wanem?

Dispela em askim wanpela senia sios lida i mekim taim em i lukluk long bihain taim bilong sios.

Reveren Hanns Giegere, Dipatmen seketeri bilong ELCPNG i tok taim em i lukluk long wok bilong seminari, evanjelisim trening na wokmanmeri trening long sios.

Em i mekim dispela tok long namba 40 greduesen bilong Ogelbeng Seminari long 6 Banz, Jiwaka Provins long 6 Disemba.

Wankain olsem seminari long Lae, Morobe Provins, dispela seminari save trenim ol pasto long go autim tok bilong God long ol manmeri long Tok Pisin.

Reveren Hanns i tok tenkyu long Ogelbeng seket i stap olsem banis bilong lukautim seminari. Em i tok seket i sanap olsem papa bilong skulim ol treni bilong wok manmeri bilong Bikpela i soim mak sios i stap long en long bilip em i gat.

Em i tok greduesen i soim tu olsem wok bilong autim Gutnius bai stap yet.

“Long wok bilong yupela tisa na prinsipal Reveren Umba Bomai i givim gutpela stia long seminari i gutpela mak,” Reveren Hanns i tok.

“Long hatwok bilong yupela, LOPC fanding i kam bikos long gutpela ripot.

“Yupela i mekim gutpela wok na seminari i kisim gutpela nem.”

“Krais i singautim yupela husat i bihainim wok na mak em prinsipal Umba Bomai i soim.

“Yupela i mas lukim dispela piksa bilong wokman na bihainim.

“Sios i lukluk long nupela karikulum bilong ol skul i bihainim senis bilong tude.

Dispela i bihainim wok na mak bilong diploma, digri na masta program long Martin Luther Seminari.”

Reveren Hanns i tok Luteran sios i nidim ol lida husat i daunim ol yet.

Em i tokaut Ogelbeng na Logaweng seminari bai kisim tok Grik na Hibru. Bihainim nupela kurikulum, ol studen bilong Ogelbeng na Logaweng bai wokim Betsela digri long Martin Luther Seminari, Lae.

Reveren Hanns i tokaut long senis na hevi bilong tude i karamapim gutpela sindaun wantaim tok bilong sanguma na kalt i go insait long ol sumatin bilong ol skul long kantri.

Lo na oda i abrusim mak bilong ol hevi em Lo Rifom i no inap stretim, tasol Tok bilong God insait long Gutnius tasol inap stretim.

Reveren Hanns i kisim dispela taim tu long tokaut long ol nupela edministreta bilong Ogelbeng seminari long 2021 em Reveren Musawepe Bungi husat bai stap prinsipal na Peter Gigmai Nana i namba tu bilong em.

Sanang Zazoring i raitim