SIOS i mas wok bung long strongim bilip, wanpela sios lida i tok.

Siaman bilong Alkena Seket bilong Evanjelikal Luteran Sios long Tambul, Westen Hailans i mekim dispela tok long taim lokal seket bilong em i bung wantaim Bethen Seket long Lae, Morobe Provins long las mun.

Em i tok wanpela sios i no inap long sanap em yet na i tok em i ken mekim wok.

Em i tok dispela i wankain long wanpela man i no inap long stap bilong em yet long mekim wok.

Ol bilip manmeri bilong Alkena Seket i bekim wokabaut bilong ol bilip manmeri bilong Bethel Seket we ol i bin mekim i go long Tambul las yia.

Taim ol i senisim ol samting ol i mekim fan resing tu long kamapim mani bilong mekim wok bilong sios.

Las yia Bethel Seket i kamapim K15,000 taim ol i go long Tambul.

Wantaim dispela mani, ol i stretim sampela ol sios bilding we i nidim mentenens.

Alkena Seket i kamapim sampela mani tu tasol Wantok Niuspepa i no inap long painim aut long dispela taim bikos kontribusen i wok long go yet.

Siaman bilong Alkena Seket, Mek Micah i tok sios i bungim planti salens long dispela taim long bilip bilong ol manmeri.

Em i tok kain wok poroman i ken strongim bilip bilong ol manmeri long tupela seket long luksave long strong bilong ol yet na long wanpela na narapela.

“Ol Kristen long Wanda Kongrigesen i lukim olsem pasin bilong helpim i karim kaikai long ol nupela wok i kamap,” Micah i tok.

“Evanjelikal Luteran Sios i bin sua long hia na bihain i go long Hailans na Alkena tu wantaim.

“Em i gutpela long mipela i kam gen long hia, long lain na strongim wok bilong mipela.”

Siaman bilong Bethel Seket, Edeng John i tok ol i bin amamas taim ol i go long Tambul las yia na i amamas tu long tok welkam long wokabaut bilong Alkena Seket i go long Lae.

Em i tok ol i wasman tasol bilong sios, tasol lida yet, em God Triwan bai  go pas long olgeta wok bilong ol.

Paulus Tali i raitim