DIVELOPMEN bilong nupela teknoloji i helpim long pait egens pasin korapsen.

Dispela long wanem ol lain husat inap tokaut long ol pasin nogut i gat planti rot long tokaut.

Long wankain taim, kain sindaun i promotim gutpela gavanens, akauntabiliti na transperensi.

Ol toktok bilong aset, wokabaut na rot bilong baim ol samting i kamap isi.

Papua Niugini Institut bilong ol Dairekta (PNG ID), Taunao Vai i tok long taim em i givim tok long ol Seketeri, Dairekta na sampela ol wokmanmeri bilong Katolik Bisop Konprens (CBC) bilong Papua Niugini na Solomon Ailan long Dairekta bilong Divelopmen Program long Mosbi las wik.

Em i tok bikos long dispela as ol manmeri na ogenaisesen i mas kamapim gutpela was long hevi i no ken kamap.

“Long taim senis long teknoloji i kamap long pait egens long korapsen, i mas gat lo i stap long soim sapos dispela ol tok i tru o nogat,” Vai i tok.

“Long taim teknoloji i senis, i gat nupela rot bilong mekim pasin korapsen long senis long teknoloji.

Vai i tok long yu bihainim stretpela pasin long mekim wok, dispela i gutpela.

Em i tok pasin bilong ol long bihainim stretpela rot bilong mekim wok i gutpela, kain pasin i kam wantaim ol skul ol manmeri i kisim long papamama na famili bilong ol.

Em i tok ol wokman husat i bihainim stretpela rot bilong wok em ol i save wok stret, mekim na pinisim gut wok na ol opis i save gat bilip na luksave long ol.

Vai i givim ol toktok tu long mining bilong Kopret Gavanens, wok bilong gavanens na menesmen, save long fainensial stetmen, wok bilong bod ov dairekta na sampela moa.