POP Francis i tok tok manmeri i mas strongim na skruim yet tingting na hop bilong ol long Bikpela Jisas Krais.

Em i tok planti salens bai kamap long laip long traim bilip tasol ol i mas sanap strong.

Em i mekim dispela tok long taim e mi holim namba tri misa bilong edven long St Peter Basilika (bikpela haus lotu) long Vatican.

Em i tok Edven i taim bilong manmeri i redim ol yet tu long amamasim bikpela de bilong mama karim bebi Jisas long krismas.

Em i tok dispela ol lotu em sios i holim i mas mekim ol manmeri tingting bek bilip bilong ol long God.

Em i tok han bilong God oltaim i op long kisim bek ol pikinini bilong em husat i lus na i kam bek long em.

Ol rit i sut long promis God i givim long ol pipel bilong Israel olsem em bai salim king na sevia bilong ol i kam.

Em dispela king husat bai mekim fri ol Israel.

Tasol long taim em i kam, ol Juda man i no givim luksave.

Ol i lukluk long kain king bilong graun husat bai kam wantaim bikpela ami na strong.

Tasol king em God i tok em king bilong pinisim dai na long bringim ol sol i go bek long God. Em dispela king bilong Spirit na i no bilong bodi.

Krismas i taim yumi ol Kristen i tok welkam long Jisas Krais husat i kam wantaim bel isi na hop.

“Mipela i mas redim tingting na lewa bilong yumi na tok welkam long Lord na Sevia bilong yumi.

 “Yumi ken mekim gut long yumi yet na givim samting long wanpela na narapela tasol yumi askim yumi yet sapos yumi inap larim spes long laip bilong yumi.

“Bai i gat ples long laip bilong yumi long larim Jisas Krais i kam insait o nogat.”

Em i tok taim yumi amamas long kam bilong Bikpela Jisas, yumi tingim tu kain laip yumi i bin bungim long dispela yia.

“Taim yumi bungim kain salens, yumi askim yumi yet sapos dispela i bringim bel isi long laip bilong yumi, haus bilong yumi, famili bilong yumi na sosaiti?” Pop Francis i tok.

“Inap Krais husat i kamap pikinini i bringim hop long laip bilong yumi?”

Em i tok Krais i bringim pogiv na bel isi long famili na yumi tu i mas mekim wankain.

Em i tok Krismas i taim bilong famili i gat bung wantaim na amamas.