OLGETA yia ol sumatin long ol yunivesiti i save yusim malolo taim bilong ol long krismas na niu yia long mekim sampela komyuniti wok.

Dispela wik Wantok Niuspepa i luksave long wanpela yangpela man long Madang Provins.

Kurere Stanis Matanzana em i wanpela ikonomiks sumatin long University of Papua New Guinea (UPNG). Dispela yia em i las yia bilong em long skul.

Taim em i stat skul long UPNG long 2018 em i save ektiv long ol skul program na ol komyuniti wok long yunivesiti. Em i wanpela strongpela man tu long sios bilong em.

Dispela krismas em i bungim gen ol yangpela long Madang na ol i klinim taun bilong ol. Dispela em i namba tri krismas em i mekim olsem. Em i hop olgeta de ol pipel bilong Madang bai i bosim ol pipia bilong ol na putim gut long pipia baket long taun.

Astingting bilong dispela ektiviti em long soim positive rol model lidasip namel long ol yanpela na long strongim ol yangpela long kamapim interes na patisipet long sosel na politikel divelopmen bilong Madang Provins. Em i amamas olsem planti yangpela long hai skul na praimeri skul i bin kamap long klinap ektiviti na bilong ol long wokabaut wantaim ol yunivesiti sumatin na mekim klinap em I wanpela bikpela samting tru long ai na bel bilong ol yangpela.

Las krismas em bin go givim tripela wara tenk long tripela Manam komyuniti long Potzdam, Asuramba na Mangem. Long baim dispela ol tenk em i bin mekim fandresing taim em i stap long skul. Nau dispela wik em i redi long bringim sampela ol tripela tep na simen na ol arapela samting long helpim em na ol wanskul bilong em long sanapim ol wara tenk long ol praimeri skul long dispela tripela kem. Mani mak em i bin bungim long dispela projek em K15,000.00. Kurere i tok tenkyu long The Voice Inc long helpim em wantaim K5,000 long dispela yia.

Narapela projek em i statim las yia em Sumatin Tisim Sumatin (STS). Aninit long dispela program em i bungim ol Madang sumatin bilong ol yunivesiti olsem PNG University of Technology, University of Goroka, Divine Word University, UPNG na ol i save tisim ol yangpela long ol hai skul long Madang long Maths, Fisiks, Baioloji, Histori na Inglis. Nau dispela yia bai ol i statim gen ikonomiks na kemistri.

Dispela em i sotpela program i save ran long 7-pela de na bihain narapela 5-pela de ol sumatin i kisim liklik mentoring long gutpela pasin bilong wokabaut olsem gutpela strongpela yangpela long komyuniti.

Em i laik lukim ol asples Madang, ol yangpela bilong Raikos, Bogia, Karkar, Amele na olgeta ples long Madang I mas mekim gut long skul na winim ples insait long ol yunivesiti olsem na em I kirapim dispela STS long helpim ol sumatin.

Kurere i mekim olgeta dispela wok aninit long bikpela hettok bilong em, Nupela Madang, Nupela PNG.

Long 2018 Kurere i bin stap wanpela strongpela memba bilong Madang Students Association bilong UPNG. Wantaim gutpela na strongpela lidasip bilong Evangelista Apelis ol i bin bungim K60,000 na K30,000 ol i bin baim tripela Oxygen Concentrator (masin bilong givim win) na givim long Modilon Jeneral Haus Sik long Madang.

Kurere em i wanpela yangpela yut edvoket i laikim ol yangpela i mas bihainim gutpela pasin na kamapim ol gutpela sindaun insait long ol komyuniti bilong ol. Em i bilip ol yangpela i ken kamapim sindaun we ol i laikim long en nau na bihain ol i ken amamas long en.

Rosa Koian i raitim