MAMBU Musik i bikpela wok ministri insait long Ivanjelikal Luteran Sios (ELC) PNG kantri.

Het tok bilong dispela mambu ministri em, "Lainim, Tisim, Strongim Ol Yangpela Long Tok Bilong God Long Musik." 

Ol yangpela bilong Masiba Paris insait long Erap i save helpim ol yet long mani samting wantaim helpim bilong ol kongrigesen na arapela rot taim ol i wokabaut.

Brian na Dumunan, tupela mani i go pas long ministri, i tok long 7-9 Ogas, 2021, bai Masiba youth i holim “Christ In Culture” ministri so long Nadamu kongrigesen.

Long dispela taim, bai i gat Baibel stadi na tenksgiving i kamap.

Dispela grup i kirap bihainim wanpela sios program ol i kolim, "Christ In Culture" ministri insait long sios.

Ol i tok welkam long olgeta Christ In Culture grup insait long ELC PNG Boana District na ol arapela lain na bihainim kain kain rot bilong soim kalsa bilong ol i wantaim pasin bilong autim Gutnius.

Mi toktok wantaim Brian Jerry - kodineta bilong "Ivanjelikal Sorob Mambu Ministri' bilong ples Sawaha na Mapes Dumunan kongrigesen yut siaman.

Tupela i stori long wok ministri bilong Sawana Bambu Ben insait long Masiba Peris, Erap – ELC PNG, Boana District.

Tupela i stori olsem: I gat 7-pela kongrigesen insait long Masiba peris.

Tasol Natabna wantaim Makasa kongrigesen tupela i bung wantaim na kamapim bambu ben ol i kolim, "Ivanjelikal Sorob Bambu Ministri," yusim mambu long kamapim musik na litimapim Biknem bilong God,” tupela i tok.

Dispela mambu ministri i bin stat long Epril, 2019.

Na ol i bin soim mambu musik bilong ol namba wan taim long ELC PNG Nesenel Sinot long Boana long Janueri, 2020.

Insait long dispela ministri, i gat samting olsem 60 memba i stap, ol manmeri wantaim sapot bilong olgeta kongrigesen memba.

Brian na Dumunan i tok, dispela mambu ben ministri em i gat komiti i bung na ranim.

Ol i stap olsem musik komiti.

I gat densing komiti tu i stap long stiaim grup bilong ol long wanem rot na pasin ol grup memba i mas mekim wantaim bilas bilong ol.

"Dispela mambu ben ministri i gat siaman, seketeri, tresera long lukautim na mekim musik grup i bihainim strepela pasin bilong mekim musik i ran gut na i no gat hevi, " tupela i tok.

Dispela ministri em i no wankain olsem arapela kalsa grup insait long Christ In Culture ministri bilong Luteran Sios.

Olgeta singsing i kam long nek bilong Erap stret long soim “Christ In Culture.” Em i olsem Jisas i stap laip na i stap insait long kalsa bilong yumi.

Ol manmeri i harim song long nek bilong ol yet wantaim mambu musik na ol i amamas, long wanem, ol yangpela i autim Gutnius long dispela rot, na em i gutpela tru!

Long statim wok misin bilong Gutnius bilong Jisas Krais ol i go pinis long ol ples olsem Boana stesin long taim bilong Sinot 2020 bilong Luteran Sios i kamap long ELC PNG Boana Distrik, Kasawa insait long Ramu misin na namba tri long 48 greduesen bilong Martin Luther Seminari, insait long Lae long las wik tasol.

ELC PNG Hagen Distrik na ELC PNG Goroka Distrik i askim ol pinis long go mekim ministri long 2021.

Sanang Zazoring i raitim