OL KATOLIK Profesinal Sosaiti (CPS) PNG i pinisim yia wantaim Tenksgiving Misa long Maria Kwin bilong Peris long Waigaini long pinis bilong las mun.

Pater Ambrose husat Spiritual Dairekta bilong sosaiti i bin go pas long Misa we insait long lotu i gat ol memba bilong CPS PNG wantaim famili bilong ol na sampela ol relijus na ol poroman.

“Yumi mas stap strong na was long ol taim we kain kain senis i wok long kamap long taim bilong yumi,” Pater Ambrose i tok.

“Dispela senis i kamap long sosait, long save na long bilip.”

Em i tok dispela taim i spesel tu bikos em i taim bilip manmeri i redi long amamasim de Mama Maria i karim bebi Jisas.

Em i tok dispela i de yumi ol Kristen i redi na was wantaim hop long kam bilong Lord na Sevia bilong dispela graun.

Em i tok yumi mas mekim yumi yet fri long ol samting i kalabusim na bringim yumi long sin.

Em i tok stap bilong nau i no gutpela tu bikos long hevi bilong wok politik.

Em i tok insait long olgeta dispela ol salens, yumi mas tok tenkyu long God.

Long wankain taim CPS PNG i tokaut na amamas olsem ol i gat grup o Daiosis Sapta nau i kamap long Alotau, Milen Be Provins na Madang na i lukluk long kamapim ol grup tu long Mt Hagen (Westen Hailans) na Lae (Morobe).

Michael Varapik, Tresera bilong CPS PNG i tokaut long sampela ol bikpela toktok em sosaiti i bin toktok long ol olsem Individual na Community Rights Advocacy Forum, kamap bilong Nesenel Pandemik Ekt 2020 na tok egens long ol embasi na ol Yunaitet Nesen (UN) ejensi we ol i toktok long stretim ol lo egensim pasin bilong man maritim man na meri i maritim meri.

Bihain long lotu wan wan memba i serim toktok long ol wok ol i mekim long strongim skul toktok bilong Katolik Sios na laik bilong God long manmeri.

Pater Ambrose Pereira sdb na Paul Harricknen i raitim