“GOD i save wari long yupela. Olsem na olgeta hevi yupela i karim, yupela i mas putim long han bilong en.”

Sampela lain i gat hevi na ol i laikim Jisas Krais long stretim o helpim ol tasol bihain long ol i askim Jisas long kisim helpim bilong em, ol yet i laik karim.

Dispela bai lukim no gat wanpela senis bai kamap bikos ol i no larim hevi bilong ol long han bilong Jisas tasol i laik karim yet dispela hevi wantaim hop olsem ol bai kamap orait.

Senis bai i no inap kamap inap ol i lusim olgeta samting long han bilong Jisas pastaim.

Moa yet ol i no save yet long mining bilong tok i stap long Buk Baibel.

Taim ol i save ol bai lusim olgeta wari bilong ol long han bilong Jisas.

Sampela taim mipela i bungim planti ol salens we mipela i no mas bungim bikos mipela i no ritim gut tok i stap long Baibel.

Baibel i gat olgeta ansa long askim bilong mipela na ol rot bilong stretim dispela ol hevi.

Dispela tok i stap long Gutnius em Jisas yet i tok long en (Metyu 11:27-28): “Papa bilong mi em i putim pinis olgeta samting long han bilong mi. Na i no gat wanpela man i save long Pikinini. Papa wanpela tasol i save. Na i no gat wanpela man i save long Papa. Pikinini tasol wantaim ol man Pikinini yet i soim Papa long ol, ol tasol i save long Papa.

“Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.”

Gutpela brata na gutpela susa, yu wok long karim hevi yet? Lusim dispela ol hevi long Jisas!

Wok mipela i mas mekim em long painim Tok bilong God bai i ken givim ansa long ol askim bilong mipela.

Em i tok moa (Metyu 11: 29-30): “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i k ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela bai yupela i kisim  malolo. Dispela plang mi putim long nek bilong yupela, em i isi long karim na smating mi givim yupela bilong karim, em i no hevi.”

Taim yumi i go het yet long mekim ol wok bilong mipela, mipela i no ken karim ol hevi bilong mipela; long wanem yumi gat Jisas Krais husat i redi long karim hevi bilong mipela olsem mipela i ken stap fri long mekim wok bilong em.

Kamap fri olsem yu ken save long wanem samting i tok tru.