EDVEN (Advent) i taim bilong bilip manmeri i wet, redi na gat hop long wanpela samting, Pater Ambrose Pereira, Seketeri bilong Komyunikesen bilong Katolik Bisop Konprens (CBC) bilong Papua Niugini na Solomon Ailan i tok.

Em i tok dispela samting ol i wet em bebi Jisas, Virgo Maria i karim long Betlehem long taim ol angelo i sing “Glori i go long God i stap antap,” (Lk 2:14).

Em i mekim dispela tok long taim sios i redi long amamasim Krismas.

Dispela Sande bai namba tri Sande bilong Adven.

Ol rit i sut long promis God i givim long ol pipel bilong Israel olsem em bai salim king na sevia bilong ol i kam.

Em dispela king husat bai mekim fri ol Israel.

Tasol long taim em i kam, ol Juda man i no givim luksave.

Ol i lukluk long kain king bilong graun husat bai kam wantaim bikpela ami na strong.

Tasol king em God i tok em king bilong pinisim dai na long bringim ol sol i go bek long God. Em dispela king bilong Spirit na i no bilong bodi.

Krismas i taim yumi ol Kristen i tok welkam long Jisas Krais husat i kam wantaim bel isi na hop.

“Em i taim yumi, famili na komyuniti wantaim i wet long kam bilong em long laip bilong yumi,” Pater Ambrose i tok.

“Mipela i mas redim tingting na lewa bilong yumi na tok welkam long Lord na Sevia bilong yumi.

 “Yumi ken mekim gut long yumi yet na givim samting long wanpela na narapela tasol yumi askim yumi yet sapos yumi inap larim spes long laip bilong yumi.

“Bai i gat ples long laip bilong yumi long larim Jisas Krais i kam insait o nogat.”

Em i tok taim yumi amamas long kam bilong Bikpela Jisas, yumi tingim tu kain laip yumi i bin bungim long dispela yia.

Em i tok 2020 i bin wanpela salensing yia bikos long kamap bilong coronavirus (COVID-19).

Em i tok dispela hevi i wankain olsem hevi ol manmeri i bin bungim long taim bilong Wol Woa II we planti laip na sindaun i bagarap.

“Taim yumi bungim kain salens, yumi askim yumi yet sapos dispela i bringim bel isi long laip bilong yumi, haus bilong yumi, famili bilong yumi na sosaiti?” Pater Ambrose  i tok.

“Inap Krais husat i kamap pikinini i bringim hop long laip bilong yumi?”

Pater Ambrose i tok arere long dispela yumi mas stopim ol pasin nogut i kamap long famili olsem famili na jenda  bes vailens (GBV).

Em i tok Krais i bringim pogiv na bel isi long famili na yumi tu i mas mekim wankain.

Em i tok Krismas i taim bilong famili i gat bung wantaim na amamas.