KALENDA bilong Lotu Katolik i bin senis long de 29 Novemba 2020.

Em i nupela de bilong statim nupela yia bilong kalenda bilong lotu.
Las yia kalenda bilong lotu Katolik Yia A, stat long 29 Novemba Kalenda bilong yia em Yia B.
Em i namba wan de bilong Adven.
Long namba wan Sande bilong Adven bilong yia B, Gutnius bilong Mak 13: 33 – 37 i singautim
yumi long kirap na wet i stap. Long tok Inglis ol i tok: STAY AWAKE, long yumi i stap seif.
Long namba wan Sande bilong Adven mi bin wokim tripela misa. Long 7 kilok mi wokim Misa
bilong Pasim Skul na Indaksen bilong olgeta eksekutiv bilong ol peris insait long Goroka Daiosis
i bung long Daiosisan Pastoral Senta long Kefamo.
Namba tu Misa long 9:30 moning i kamap long St. Mary’s Peris long Goroka. Long wankain
taim mi bin baptaisim 9-pela manmeri na pikinini i kamap Katolik. Na long 4 klok apinun mi
wokim narapela misa wantaim ol pipel long Faniyufa Autstesen bikos narapela pater i no kamap
long moning.
Long dispela tripela Misa, mi bin givim wankain skul, “STAY AWAKE” o STAP WAS!
Long helpim manmeri long save gut long dispel skul, mi bin wokim wanpela olpela stori bilong
wanpela man i slip long nait na em driman olsem em i wokabaut i go antap long wanpela bikpela
maunten.
Em i amamas tru long wokabaut i go na em i bin kamap long wanpela ples, rot i liklik tru. Taim
em i apim het na lukluk i go long fran, em i lukim wanpela bikpela enimal laion i stap i opim
maus wantaim sapela tit na i redi long kilim dispela man. Dispela man i pret nogut tru.
Em i traim long painim rot long ranawe long dispela laion. Em i no inap go long lephan, bikos
maunten i antap tru na i sanap stret i go daunbilo long wara. Em i no inap go long raithan, bikos i
gat bikpela ston i go antap na i nogat wanpela man bai inap kalapim dispela ston.
Nau em i laik tanim bek na ran. Tasol taim em i tanim bek na laik ran i go, em i lukim wanpela
bikpela pukpuk i stap, maus bilong em i op bikpela tru na redi long kaikai em.
Tingim gut, dispela man i driman i stap.
Long dispela kain stap, yumi ken askim olsem long wanem rot bai dispela man i kamap seif?
Wanpela rot tasol – EM I MAS KIRAP long slip bilong em.
Bikos sapos em i kirap long slip, driman bilong em bai i pinis. Em i bai seif. Tasol sapos em i
slip yet na driman, em bai stap pret yet. Olsem na wanpela rot bilong kamap seif, em long kirap
long slip!
Namba wan Sande bilong Adven i singautim manmeri long kirap na wet i stap. “Stay awake!”
Tasol i no sindaun na wet nating. Taim yumi wet i stap, yumi mas wokim sampela wok. Bikos
sapos yumi sindaun na i no wokim wanpela wok, yumi bai pilim tait na les. Sapos yumi i no
wokim wanpela wok, yumi bai pilim olsem taim bilong wetim em i longpela tru. Tasol sapos
taim bilong wetim yumi yusim long mekim sampela wok, em i no inap mekim yumi tait o les.
Wanem samting yumi bai wokim long taim yum wet i stap? I gat planti wok yumi inap long
wokim.

Namba wan; kamapim spiritual laip bilong yu long PREA! Wokim pre bilong yu yet o wokim
pre wantaim famili na komyuniti bilong yu.
Stap insait tu long kain kain wok bilong sios bilong yu; olsem wok sol, helpim ol tarangu,
komyuniti wok bilong klinim ples o haus lotu na planti moa wok yumi inap long wokim.
Olgeta de yumi inap long wokim kain kain wok wantaim famili, long skul o wok ples na tu long
komyuniti bilong yumi wan wan.
Sapos yumi stap insait long kain kain wok bilong redim yumi yet long selebretim Krismas, mi
bilip olsem bai yumi selebretim Krismas wantaim BIKPELA AMAMAS!
Pinis…