OL Michaelites, lain brude na pater bilong Santu Michael Akangelo (CSMA) i bin amamasim
50-yia anivesari bilong ol long Papua Niugini long las mun.

Olgeta i bin bung long Kuli peris long Mt Hagen Asdaiosis, Jiwaka. Ol i bin kisim tripela de
long amamasim dispela anivesari.
Dispela selebresen i kamap wantaim amamas bilong fai-yia anivesari bilong “Divine Mercy
Shrine” long Ruquist, Kuli peris.
Dispela selebresen i kamap tu long Pestode bilong “Blessed Virgin Mary,” o Mama Maria.
Planti ol misineri wantaim ol manmeri long Hailans rijon i bin kamap tu long amamasim
dispela de.
Namel long ol em Asbisop Douglas Young bilong Mt Hagen Asdaiosis na Bisop Arnold
Orowae bilong Wabag Daiosis, Enga Provins.
Asbisop Young husat i go pas long selebresen i tokim ol manmeri long bihainim Maria long
redi long tok orait long singaut bilong God na karimaut wok bilong em.
“Wanpela rot bilong tok tenkyu em long serim wanem samting yumi gat long tude wantaim
ol pikinini bilong yumi na ol lain tumbuna bilong yumi,” em i tok.
“Mipela i no inap tok tenkyu long ol misineri husat i bringim tok i kam long yumi.
“Mipela i mas tok tenkyu long God long kisim ol Michaelites misineri long bringim tok
bilong em i kam.
“Ol misineri bikos long ol Tok Promis bilong ol long ol i no ken gat samting bilong ol yet
(Poverty), long harim tok bilong bisop na superia na long ol i no ken marit i mas mekim yumi
i tingim bek pasin bilong harim tok bilong Bikpela Lord Jisas husat i harim tok bilong Papa
bilong em.
“Taim ol i lusim famili bilong ol, ol i pas wantaim Jisas husat i bos na lida long laip bilong ol.
“Na olsem long bipo taim, Jisas na ol disaipel, wan wan bilong ol i no gat samting bilong ol
yet tasol i serim wanem samting ol i gat wantaim.
“Jisas i harim tok bilong Papa God, ol Michaelite tu bai harim tok bilong bisop na superia
bilong ol.
“Olgeta arapela bikpela lain long Baibel olsem Abraham, Moses na Maria i harim tok bilong
Bikpela God tasol, maski ol yet i no save wanem samting bai kamap.”
Asbisop Young i tok ol Michaelites misineri olsem Pater Ludwik Wypasek, Pater Stanislaw
Sniezek na Pater Zdzislaw (Zyggy) Kruczek husat i kam long kantri long 1970 long namba
wan taim i kam wantaim wan wan ol strong Holi Spirit i givim long ol.
“Wan wan bilong ol i narapela narapela tasol olgeta i gat wanpela tingting tasol, long autim
Tok bilong God.
“Mipela i mas askim Mama Maria long helpim long pre long pikinini bilong em Jisas long
strongim ol Michaelite long wok bilong ol.”

Simon Mokot i raitim