Katolik Sios long Kaugia i bin bungim bikpela lain bilipmanmeri long olgeta hap bilong Not na Saut
Wosera insait long Is Sepik Provins, long lukim na harim “tok YESA bilong oltaim ”bilong Sista
Meryline Yasaku RSM.

Long 14 Novemba 2020, Sr Meryline i tok “yesa” long stap insait long lain bilong ol Mercy Sista na
bihainim relijes lo na pasin bilong ol. Em i mekim foapela promis: selibesi (no ken marit), poveti
(olgeta samting givim long komuniti), obidiens (harim tok bilong lida) na mekim wok marimari. Na
dispela tok promis em i bilong oltaim, inap long laip i pinis.
Dispela lain ol reljis sista – Mercy Sista – i save mekim bikpela wok marimari insait long PNG, na ol
pipel i save long ol moa yet long wanpela program ol i kolim Mercy Works. Nau Sr Meryline i laik
mekim kain wok long olgeta hap ol lida i laik salim em. Sapos ol i salim em long narapela provins, o
narapela rijen, o narapela kantri, em bai bihainim tok na mekim wok marimari na givim witnes long
laip bilong em bilong strongim Kingdom bilong God.
Sr Meryline i mekim dispela promis long ai bilong Sista Mariska Kua RSM, husat i makim maus bilong
lida bilong lain Mercy Sista long Autralia na PNG. Bishop Jozef Roszynski SVD, em i kam long Kaugia
bilong strongim “tok yesa” bilong Sr Merylin long blesim bilong em.
Ol famili bilong Sr Meryline i tok orait long givim em olsem presen i go long God, na ol i redim
naispela prosesio na lituji bilong Misa.
Bp Jozef i singautim olgeta yangpela manmeri long tingim vokesen bilong ol. Na wankain olsem Sr
Meryline ol i no ken pret long lusim papamama, bratasusa, ples na olgeta samting na kamap
wokman na wokmeri bilong God olsem relijes sista, bruda na moa yet long kamap pris. Em i tok Sios i
nidim yupela, no ken givap.