INAP long 16 sumatin long Martin Luther Seminari long Lae, Morobe Provins i greduet
wantaim diploma na digri long pinis bilong las mun.

Long dispela namba, sampela sumatin i greduet wantaim Diploma long Tioloji na sampela i
greduet wanaim  Basela long Tioloji.
Namel long ol, wanpela sumatin i greduet wantaim “Edvens Diploma long Tioloji na wanpela
sumatin i greduet wantaim spesel Setifiket  Program.
Martin Luther Seminari Prinsipal, Reveren Dokta Michael Wan i tokim ol sumatin olsem ol i
pinisim tasol wanpela hap bilong singaut bilong ol.
Em i tok narapela hap i longpela na i hatwok na dispela namba tu hap i bikpela salens long
laip bilong ol.
Bihainim tok long Aisaia 6:8, "Hia mi stap, Bikpela yu salim mi," ol tu i wankain.
Em i tok profet Aisaia i mekim long soim olsem, em i laik bihainim maus bilong God na
mekim laip bilong ol pipel i kamap gut.
“Olsem na yumi  tu i mas mekim olsem insait long sios bilong God tude.
"Insait long olgeta wok bilong save o akademik, maski em i wok bilong saiens na teknoloji o
bisnis, seminari o wanem kain wok, yumi i kisim singaut long mekim laip bilong ol arapela
manmeri i kamap gutpela.
“Long dispela as yumi kisim trening na kisim singaut bilong wok.”
"Taim yumi  kisim bikpela save na  gutpela sindaun wantaim mani na kago, yumi  mas i gat
tingting na wari long helpim ol pipel long kisim dispela kain senis tu.
“Papua Niugini i go insait long planti senis, yumi mas mekim ol manmeri i go wantaim
dispela senis na kisim gutpela sindaun long laip bilong ol.”
Martin Luther Seminari i ran aninit long patnasip bilong Ivanjelikal Luteran Sios bilong
Papua Niugini wantaim Gutnius Luteran Sios bilong Enga.
Namel long ol, tupela sumatin bilong Gutnius Luteran Sios bilong Enga i greduet tu, wanpela
i greduet long Diploma bilong Tioloji na narapela em i greduet wantaim Basela bilong Tioloji
digri.
Pastaim Gavana bilong Morobe, Kelly Naru i makim Praim Minista James Marape na i stap
insait long greduesen.
Em i amamas long ol sumatin i greduet na i tok tenkyu long ol tisa i skulim ol.
"Dispela  i soim olsem, ol i kisim singaut long wok wantaim ol pipel long givim sevis long
ol," Naru i tok.
"Em i bikpela salens long 2020 bikos long hevi bilong coronavirus (COVIS-19 we olgeta
kantri i mekim wok long sapotim ol yet," Naru i tok.
“Tasol wantaim marimari bilong Bikpela yumi Papua Niugini i no kisim bikpela bagarap
long laip.
“Yumi olgeta i mas givim tenkyu long God long dispela lukaut.”
Sanang Zazoring i raitim